Biagini salvó un puntu pal Sporting

El Sporting de Xixón nun foi a resolver nel partíu que xugó ayer escontra'l filial del Real Madrid, nel que tuvo más ocasiones pero que tampoco llamó l'atención pol bon futbol de nengún de los dos equipos. (1-1)

L'equipu de casa salió arrollando al filial blancu nos primeros minutos, con Pablo Álvarez y Juan apurriendo balones dende les bandes que nun alcontraben rematador énte la poca opoeratividá de Calandria. Pela so parte, el Castiella-Madrid B tentaba'l xuegu a la contra, llegando Soldado a tirar delles vegaes sobre la portería de Roberto, que retrucó a tolos intentos del equipu visitante. Cuando'l primer tiempu daba les boquiaes, Juan tuvo la meyor oportunidá y la más prestosa de ver pal Sporting, alloriando a tola defensa blanca nel so área y quedando solu énte l'arrebatedor visitante, Codina, que torgó lo que yá se cantaba como gol.

El xuegu decayó nel segundu tiempu y l'árbitriu fizo por ello, interumpiendo bien d'acciones d'ataque, les más d'elles al Sporting, lo que-y valió a Mateu Lahoz l'enfrentamientu col públicu, que llegó al máximu cuando nun sacó tarxeta por una durísima entrada de Javi García qu'obligó a retirase a Javi Fuego. Los cambeos resultaron claves nos dos conxuntos, y asina, a nueve minutos del final, l'acabante entrar Valero, nuna xugada de velocidá na que garrío desprevenida a la defensa asturiana, marcó batiendo per baxo a Roberto y adelantando al Madrid. Munchos espectadores colaron del campu, colo que nun vieron el gol del empate, obra de Leo Biagini, al que Ciriaco Cano dio entrada a diez minutos del final. El delanteru d'Arroyo Seco tuvo otra oportunidá más de gol clara y tuvo mui trabayador el pocu tiempu que tuvo en campu, ello dempués d'una selmana en que'l futbolista llegó a quexase a la prensa del pocu enfotu que tien nelli l'entrenador Ciriaco Cano.