Bertu Ordiales y Guillermo César Ruiz asoleyen la “Guía de los árboles d'Asturies”

El divulgador de la naturaleza asturiana Bertu Ordiales y Guillermo César Ruiz presenten una prestosa novedá editorial, la so obra "Guía de los árboles d'Asturies", que s'ufierta como "la más completa publicada hasta agora" y que recueye 95 especies d'árboles que se puen atopar pelos montes asturianos, con información detallada de cada planta, tanto no tocante a la botánica como a aspectos culturales o lliingüísticos.

Asoleyada pola editorial Trabe, la guia ofrez el nome científicu, la familia a la que pertenez, la denominación n'asturianu y gallego - asturianu más comunes de cada árbol y tamién otros sinónimos, amás del nome en castellanu, portugués, francés, alemán y inglés.

La información técnica complétase cola esplicación del so étimu científicu, la descripción de les sos característiques y del hábitat onde medra, los sos usos tradicionales y aplicaciones, la toponimia asturiana rellacionada col so nome y, nun apéndiz, otros datos d'interés, como les posibles variedaes del frutu. Indícase, igualmente, si se trata d'una especie melicinal o comestible, si ta protexida o si ye tóxica.

Con cásique 500 fotografíes a color (de extraordinaria calidá), dibuxos de los tipos de fueyes, frutos, inflorescencies y conos, la obra complétase con una breve y útil introducción a la botánica y con dos amplios glosarios, unu botánicu y otru melicinal. Por últimu, l'índiz de nomes vulgares recueye más de 1.100 términos en llingua asturiana.


Los autores, Bertu Ordiales y Guillermo César Ruiz, publicaren yá nel 2002 la obra "21 rutes de senderismu per Asturies.