Berto García y Carlos Suari presenten'l so poemariu "Treslallende" en Corvera

Carlos Suari y Berto García, dos de los poetes más mozos del
panorama lliterariu asturianu, presenten esta selmana'l so llibru conxuntu de
poemes "Treslallende", estoyu de poemes escritos dende la
emigración y dende la condición de "lleendes urbanes".
L'actu va tener llugar esti llunes nel Salón d’Actos del Centru
Social Tomás y Valiente de Les Vegues a les 7 de la tarde.

Editáu pola casa "Trabe" el llibru amuesa "dos
visiones poétiques de la fuxida forzosa, del dolor que significa pa
ellos dexar atrás l'alma qu'alluma los caminos, pa ganase la vida nel
ermu ayenu" nes palabres del tamién escritor Xulio Vixil, que
define la obra d'estos dos autores como "l'esiliu modernu de los que nun
esisten". El filólogu esplica que tres del títulu
xenéricu de la obra "escuéndense dos poemarios, con dos
autores y dos mundos, pero un mesmu esiliu, el qu'obliga a la mocedá
d'Asturies a marchar del so país siendo invisibles, siendo esiliaos
inesistentes. Berto García (31 años, Les Vegues, Corvera) ye
autor d'Ensin otra sida (Trabe, 2005) y de mui bien d'obra publicao nes
revistes de lliteratura del nuesu país, casu d'Entellunu, El Canciu'l
Cuélebre, Lletres Asturianes y Reciella Malory. Mayestru de
profesión, trabaya como interín anguaño nuna escuela de
Castiella y ye miembru de la Banda de Gaites de Corvera. Pela so parte, Carlos
Suari (24 años, La Xuncarosa, Avilés) ye autor del poemariu
"El mio cachu tírolu" publicáu n'internet de forma
llibre en 2005. Llicenciáu en Ciencies de l'Actividá
Física y del Deporte, estudiante d'Antropoloxía Social y Cultural
y xuez y monitor de deportes tradicionales asturianos, tien tamién
escrites delles publicaciones científiques sobre l'aplicación
educativa de la tradición física.