Berto García asoleya’l so poemariu ‘Inercia’ cola editorial Trabe

El quintu poemariu del poeta corverano Berto García, de nome ‘Inercia’, ta acabante d’espublizase. Esta obra, editada por Trabe, trátase d’una recopilación de 38 poemes y tien una tirada de 500 exemplares.

L’autor corveranu opta nesti títulu por poemes cenciellos y cada vez más curtios, y cuenta cola collaboración de Vanessa Gutiérrez y Carlos Suari. El direutor de la Escuela Infantil de Gudín, nacíu en Les Vegues nel 1975, principió a trabayar nél tres finar el so trabayu anterior, ‘Manual contra’l vacíu’ (2008), pol que recibió el Premiu Fernán-Coronas. ‘Inercia’ ye’l cuartu trabayu qu’espubliza con Ediciones Trabe, yá que tamién asoleyó cola editorial uviedina ‘Ensin otra sida’ (2005) y ‘Treslallende’ (2007), escritu a medies con Suari. Mientres, nel 2009 ganó’l Premiu Llorienzu Novo Mier por ‘Cuando’l mundu debala’ (Academia de la Llingua Asturiana, 2011).

A la so obra lliteraria hai qu’añadir una multitú de collaboraciones repartíes poles revistes lliteraries del país, como El Canciu’l Cuélebre, Lletres Asturianes, Lliteratura, Formientu, Lletres Lliterariu o Entellunu, y nes antoloxíes ‘Pa[i]saxes’ y ‘Cuando la memoria fala’. Como espertu en llingua asturiana y maestru d’Educación Infantil, ellaboró les tornes de los llibros pa neños y neñes ‘Florenta, la gata poeta’ y ‘Les fábules de Leonardo da Vinci’, dambos pa la editorial Cumio.