Bermeyu va ser el candidatu d’Andecha Astur pal 10-P

|
Llucía Fernández Marqués y Arturu Xosé Bermeyu candidatos Andecha Astur a les estatales

Andecha Astur va facer cambios nes sos llistes de cara a la repetición d’eleiciones del 10 de payares. Arturu Xosé Bermeyu, númberu 1 al Senáu n'abril, pasa a ser el candidatu al Congresu, cola anterior cabezalera Llucía Fernández Marqués como segunda.

Paulo Arboleya, Dulce María Gil Fernández, Mario Arbesú, María Sonia Díaz Suárez y Miguel Ánxelu Agudo completen el restu de puestos. Mentes, pa la Cámara Alta la formación nacionalista presenta a Ana Fernández Marqués como primer opción, con María Dolores Suárez Vallina y Mariano Suárez Rodríguez como otros candidatos.

Andecha Astur, que critica que “la repetición d’estes eleiciones estatales pon n’evidencia que los partíos políticos españoles y el sistema que los sustenta van de fracasu en fracasu, ensin ser quien a dar rempuesta a les aspiraciones de progresu, sociales, nin nacionales de los pueblos del Estáu”, pide “reflexón a los asturianos”, a los que convida “a votar por Asturies”. La organización preséntase énte la sociedá asturiana “como una ferramienta util que permita avanzar hacia una Asturies soberana y socialista, que garantice les llibertaes individuales y coleutives, entamando pol drechu a trabayar y vivir dignamente,  y que fine cola emigración forciada de la mocedá asturiana, coscientes de que namás votando una opción asturiana tendrá posibilidaes de repatriase y costruyir un futuru dignu na so tierra”, destacando que ye la única fuercia asturiana en presentase en solitariu nestes eleiciones.

Na semeya, Llucía Fernández Maqués y Bermeyu.

Contador Estadistiques