El próximu sábadu 21 de xunetu van celebrase na escuela pública de Benia d'Onís, les primeres Xornaes "La Torraya" sobre Races autóctones asturianes, que van centrase na oveya xalda y el gochu celta.
El local gastronómicu y cultural La Torraya, asitiáu en Silviella (Onís) ye l'organizador d'estes xornaes nes que collabora l'Asociación de criadores d'oveya xalda y l'Asociación de criadores de gochu celta asturianu y que pretenden dar a conocer a ganaderos, criadores y xente interesao, les característiques distintives de dos razes de ganáu asturianes: la oveya Xalda y el Gochu Asturcelta.
Antón Álvarez Sevilla, secretariu técnicu de l'asociación de criadores d'oveya xalda ACOXA, Juan Menéndez Fernández, xestor del llibru xenealóxicu de l'Asociación de Criadores de Gochu Astur-celta, ACGA y Máximo González Aguilar del programa Leader Plus "Oriente d'Asturies" van participar nel programa d'actividaes, qu'incluye una muestra d'animales de les dos races.