Belén Fernández esixe midíes a Pastor pol caos ferroviariu

Unvió-y una carta na que-y demanda con Renfe la mesma contundencia que coles cancelaciones de Vueling.

D'esta forma, la conseyera d’Infraestructures, Ordenación del Territoriu y Mediu Ambiente, Belén Fernández, cumple'l compromisu asumíu’l vienres pasáu na celebración de la primer xunta del grupu de trabayu téunicu sobre’l tresporte públicu nel país, creáu dientro del Consorciu de Tresportes d’Asturies (CTA). Na carta esixe a Ana Pastor, ministra de Fomentu en funciones, qu’aplique la mesma contundencia anunciada ante les cancelaciones de la compañía aérea Vueling y que tome midíes por cuenta del caos ferroviariu provocáu poles suspensiones de trenes n’Asturies, que son de la so competencia directa, y amás son obligación de serviciu públicu.

“Toi d’alcuerdu en qu’ante’l caos de los aviones nun ye abondo pidir disculpes a los usuarios, pero ante’l caos de los trenes n’Asturies tampoco”, atayó Fernández. La responsable nacional en materia de Tresportes y Movilidá sorraya que la perda de calidá del serviciu cada vez más grande foi la causa que llevó inexorablemente a los ciudadanos a dexar d’utilizar el serviciu ferroviariu de cercaníes n’Asturies.

“El pasu del tiempu evidencia cómo los esfuerzos nel fomentu de la intermodalidá fechos pol Principáu pierden la eficacia cuando’l ferrocarril vese priváu d’una de les sos principales ventayes competitives al respective del turismu, que ye la fiabilidá. Frente a esta realidá, los miembros del grupu de trabayu entendemos que la nuestra actitú nun pue ser la de resignación, sinón la de esixencia respetuosa d’una reacción convincente y inmediata dende’l grupu Fomentu”, señala nel testu. Nesti sen, la conseyera y presidenta del CTA califica de “tardíes” y “escases” les midíes anunciaes por Renfe, porque los ciudadanos nun pueden tar un mes enteru –tiempu baraxáu pola compañía p’acabar cola situación de les últimes selmanes– cola inseguranza de si van poder o nun utilizar el tren pa llegar a los sos destinos.

“Dende’l grupu de trabayu de tresporte públicu apuramos al Ministeriu de Fomentu pa que reponga inmediatamente los medios humanos y materiales pa que tolos servicios cancelaos nes últimes selmanes queden dafechu restituyíos, máxime considerando que la so cancelación faise en clara vulneración de les obligaciones de serviciu públicu impuestes pol Ministeriu de Fomentu al operador ferroviariu. Tamién, qu’arbitren los mecanismos afayadizos pa la información necesaria al usuariu, respetando los sos derechos ante incidencies eventuales que puedan producise”, apunta.

Un plan global de cercaníes que modernice'l tren

Cuasi a lo postrero pide al Ministeriu qu’apruebe un plan global pa les cercaníes ferroviaries que modernice’l tren n’Asturies y resuelva los problemes estructurales que carez, acompañáu d’un calendariu coles previsiones presupuestaries necesaries pa executalu. Fernández señala qu'esa fueya de ruta y imprescindible pal bienestar social y la calidá ambiental n’Asturies, y ha de contemplar midíes pa la meyor xestión de la esplotación de les cercaníes y inversiones relatives al so material rodante, infraestructures, apeaderos y estaciones, dende l’apueste esencial pola intermodalidá y la penetración nes ciudaes pa la mayor captación de viaxeros.