Belén Fernández encamienta al PP a que reclame a Rajoy la superestructura del soterramientu de Llangréu

La conseyera d'Infraestructures, Belén Fernández, encamentó na Xunta Xeneral al PP asturianu a demandar a Mariano Rajoy la superestructura del soterramientu de Llangréu. Señaló que’l so departamentu va llicitar por 150.000 euros el proyeutu de la obra, que tendría d'acometer l'Executivu estatal.

El pidimientu concretu a Rajoy ye pa que dea instrucciones inmediates al Alministrador D'Infraestructures Ferroviaries (ADIF) pa que desendolquen estos trabayos, qu'inclúin elementos como los raíles, les travieses y la catenaria que van dexar la circulación de los trenes. D’igual forma, Fernández pidió que, alternativamente, tresllade al Ministeriu d'Industria que pongan a disposición los fondos mineros 2013-2018 que dexaríen aplicar el conveniu soscritu col Gobiernu pa la execución de los trabayos de soterramientu.

“Como ven, doi-yos opciones; el so deber ye mediar en Madrid buscando soluciones pa Llangréu”, sorrayó Fernández a los populares asturianos. La titular d'Infraestructures recordó que'l conveniu soscritu ente'l Gobiernu nacional y l'Executivu estatal en febreru del 2007 pa la integración de la llinia Xixón-Llaviana en La Felguera y Sama, tien por oxetu una encomienda de xestión del Ministeriu de Fomentu a Asturies, y non la cesión d'una competencia.

Dichu documentu afita qu'Asturies va contratar les obres contando con financiamientu procedente de fondos mineros, polo que si desapaez un supuestu básicu d'esa encomienda, como ye l’habilitación de dichos fondos, nun tien sentíu siguir reconociendo vixencia a la mesma, sinón que tien de ser l'Estáu'l que la asuma y exerza, apunten dende la conseyería. El Gobiernu va destinar anguaño 4,5 millones pa les obres, executaes yá nun 96 por cientu, con una finalización prevista en siete meses.

Según los datos qu’ufrió la conseyería, hasta agora l'Executivu invirtió 72 millones nos trabayos y en plazu curtiu va llicitar por 150.000 euros l'actualización y adaptación a la normativa de seguridá del proyeutu de la superestructura, que tendría que facer l'Estáu.