Belén Fernández demanda a Rajoy “fondos y voluntá política” pa dar puxu al Plan de Víes de Xixón

|

L’escaezu del Plan de Víes de Xixón nos Presupuestos Xenerales del Estáu conduz a una paralización nueva del proyeutu que provocó la reaición de la conseyera d’Infraestructures, Ordenanción del Territoriu y Mediu Ambiente. Belén Fernández González reclama al Gobiernu de Mariano Rajoy “fondos y voluntá política”.

“Ye la falta de compromisu del Executivu central la que caltién esti proyectu en puntu muertu y eso sábelo tola sociedá asturiana”, señaló la socialista, que se dirixó al Partido Popular (PP) esta mañana pa que “dexe d'inventar esculpes sobre'l plan” y nun cargue “la responsabilidá de la so propia inaición” al Gobiernu asturianu. “Dende’l 2011 hasta esta parte, primero con más de cuatro años de gobiernu de la ministra Pastor, y paez qu’agora’l ministru De la Serna sigue pela mesma sienda, el Plan de Víes esperimentó una situación de permanente paralís”, aseguró Fernández González, que ve esta obra “fundamental pa Xixón y pa la movilidá metropolitana nel conxuntu d’Asturies”.

Según señaló, esi interés nel avance del Plan de Víes queda claramente reflexáu nel documentu Alianza poles Infraestructures del Estáu qu'Asturies Precisa, testu suscritu'l pasáu 23 de marzu por organizaciones empresariales, sindicales, sociales, la FSA y Izquierda Xunida qu’apuesta por dar puxu a la obra y, prioritariamente, a la estación intermodal de viaxeros, “siguida de la penetración ferroviaria pa la llegada del tren hasta posiciones de clara centralidad na ciudá”. “Tanto Rajoy como'l ministru de Fomentu tienen yá sobre la so mesa esi documentu, nel que s'inclúi'l Plan de Víes como proyeutu prioritariu y urxente”, insistió la conseyera.

Al so xuiciu, el PP “busca desesperadamente crear cortines de fumu con argumentos de poco fuste”, nesti casu, “p'azorronar el notable olvidu al Plan de Víes nel proyeutu de Presupuestos Xenerales del Estáu p'anguaño”.

Contador Estadistiques