Belén Fernández defende la utilidá de protocolos anticontaminación como l'activáu n'Avilés

Recordó que tanto los protocolos como los dos planes de meyora de la calidá del aire vixente, el d’Avilés y rodiada y el de l’aglomeración de Xixón, tán siendo revisaos.

La conseyera d’Infraestructures, Ordenación del Territoriu y Mediu Ambiente, Belén Fernández, defendió la utilidá de los protocolos diseñaos pol so departamentu p’aplicar cuando la meteoroloxía dificulta que les partícules contaminantes s’espardan na atmósfera, y que s’activaron, la última vez, esti 1 de payares na rodiada d’Avilés. Tamién anunció que previsiblemente va establecese un nivel adicional, llamáu 'de prevención', nel que, énte fenómenos d’inversión térmica y valores diarios de partícules altos y siguíos, van esixise determinaes midíes, cola mira d’ayudar a que nun se pasen los topes que lleven a activar la prealerta o que, si se pasen, esa superación resulte más baxa que la que se produciría ensin midíes.

Na so comparecencia énte la Comisión d’Infraestructures de la Xunta Xeneral, Fernández precisó qu’adoptar les midíes incluyíes nesos protocolos nun implica que se tea incumpliendo la llexislación. Ello ye qu’indicó que la so activación, inclusive más d’una vez al añu, ye perfectamente compatible col cumplimientu de la normativa ambiental.

"Cola llei europea y española de calidá del aire na mano, ye llegal superar anualmente hasta 35 díes la concentración de partícules percima de 50 microgramos por metru cúbicu. Pos bien, frente a esti marxe, colos protocolos qu’aplicamos n’Asturies, cuando esa superación se da 3 díes y hai previsiones d’estabilidá atmosférica pa los siguientes, actívase’l nivel de prealerta y adóptense les midíes consiguientes”, esplicó.

Instrumentos preventivos

La titular de Mediu Ambiente añadió que n’otres comunidaes nun hai activaciones d’esti tipu, non porque nun sufran situaciones de concentración de polución asemeyaes a Asturies, sinón porque nun tienen los instrumentos preventivos y protocolos de los que si se dotó’l Gobiernu. P’acabar, la conseyera sorrayó que la evolución de los datos de la rede oficial de calidá del aire n’Asturies amuesa una meyora contundente, xeneralizada y siguida nos últimos doce años. En concreto, les zones oriental y occidental cumplen dafechu y de sobra los valores tope o oxetivu que pa cada contaminante del aire establez la llexislación ambiental vixente, según esplicó Fernández.

Pela so parte, Avilés y rodiada y l’aglomeración de Xixón, pa les que s’ellaboraron nel 2014 dos planes de calidá del aire cola mira d’atayar el problema coles partícules PM10 en 2 de les 22 estaciones de midida (avenida de l’Arxentina, en Xixón, y El Mataderu, n’Avilés), cumplen los valores tope llegales pa tolos contaminantes dende’l 2011, nun siendo la de les partícules en suspensión, y nuna única estación, la d’El Mataderu, asitiada a la entrada de la Inspeición Téunica de Vehículos (ITV) d’Avilés y nuna redolada portuaria, según los datos de la conseyería. Una estación que, como’l mesmu ministeriu reconoció apocayá per escrito, nun ye representativa de la calidá del aire que s’alienda nos núcleos urbanos d’Avilés o Salinas, aseguró la conseyera.