Bayura d'estilos na XI Edición del Derrame Rock

El Derrame Rock, festival de música que l'añu pasáu axuntó a más de 15.000 espectadores en Pravia, llega a la so XI Edición, na que va repetir llugar de celebración. El polideportivu pravianu d'Agones va ser l'escenariu ente los díes 29 de xunu y 1 de xunetu d'esta nueva edición del certame qu'entama la productora Santo Grial y que presenta nel cartel a 27 grupos de los estilos más estremaos, bien d'ellos con un nome propiu fechu na escena musical.

Esti festival presentóse na mañana d'ayeri na Conseyería de Cultura cola presencia del Director Xeneral de Cultura Carlos Madera, l'alcalde de Pravia Antonio de Luis Solar, la directora del Institutu Asturianu de la Mocedá Carmen Barrera Fernández, Alberto Palacio representante de la casa de refrescos Coca-Cola y la cabeza visible de la organización del Derrame Enrique Granda. Toos ellos amosaron la so satisfacción pol fechu de que'l Derrame llegue a esta XI edición, sobre too depués de los momentos difíciles polos que pasó al dexar de facese en Llangréu, y nos que pensó na desapaición del eventu. Asina Carlos Madera felicitó al alcalde de Pravia por apostar va trés años por esti festival que buscaba un conceyu onde poder desarrollase. Pela so parte la directora del Institutu Asturianu de la Mocedá espresó tamién la so satisfacción por collaborar col Derrame. Ello ye que dientro del festival va facese, como l'añu anterior, la final del concursu de maquetes de la cadena musical 40 Principales nel que collabora l'Institutu. Los grupos ganadores, amás del premiu, entren nel cartel nel Derrame Rock del añu siguiente, y asina por exemplu na edición d'anguaño del Derrame toquen Dogfight y Ermitaños del Rio, ganadores l'añu pasáu.

El cartel presenta aportaciones de toa Europa ente les que llama l'atención de la italiana "Banda Basotti" o'l grupu de heavy alemán "Helloween". Amás d'ellos, grupos españoles ente los que tan Celtas Cortos cola so formación orixinal col cantante Jesús Cifuentes, Def con Dos presentando DVD en directo; tamién The Locos, el grupu nuevu del cantante de la desapaecida banda SKP, l'Hip Hop de SFDK, El Combo Linga, Barricada, Hamlet, Amparanoia, La Excepción, Koma y tamién la representación asturiana esti añu encabezada pol raperu de la Pola L.lena Dark la Eme y Jacky Trap, grupu esti últimu que va tocar el día 29 xueves xunta Amparanoia y Sonora na fiesta de presentación del festival que, baxo'l títulu "Voz de muyer" va valir tamién pa dar a conocer los conteníos del festival "Derramidea" actividá paralela al mesmu derrame que la organización acuta pa falar tolos años d'ámbitos rellacionaos cola solidaridá y los movimientos alternativos.

Nesta edición 2005 la protagonista va ser "la llucha de les muyeres pola lilbertá" pa lo que van organizase conferencies y actividaes en collaboración con colectivos de muyeres de Ciudad Juárez (México) y de Guatemala, amás d'una esposición sobre Dolores Ibarruri o una mesa redonda sobre "xéneru y música" ente otres actividaes, mientres que la feria d'asociaciones xuveniles y ONGs qu'acompaña al festival va acutar un güecu preferente pa organizaciones que trabayen polos derechos de la muyer.