Baxen les hospitalizaciones n'otra xornada de récor de contaxos de coronavirus

Rexistráronse 3.794 casos nuevos de COVID-19.

Esta cifra ye la más alta de tol andanciu, superando los 3.633 del martes –aumentaron dende 3.605 llueu d'una revisión de cifres–. Sicasí, esti aumentu nun se ve reflexao nes hospitalizaciones, que tornen a baxar per segundu día.

Si'l miércoles había 426 pacientes cola enfermedá causada pol coronavirus SARS-CoV-2, ayeri la cifra asitióse en 406. En planta tán ingresaes 350 persones, 19 menos, y 56 na UCI, 1 menos.

La ocupación total por esta patoloxía nos hospitales ye del 11,59 por cientu y del 18,24, de manera respeutiva.

Seis finaos

Na xornada hebo que llamentar la muerte de sies persones, dos muyeres de 102 y 95 años y cuatro homes de 93, 79, 73 y 73. No que va d'andanciu la cifra total de finaos llega a 2.211.

Na semeya, autocovid instaláu tres el Palaciu de Deportes de Xixón.