Batasuna: "el PSOE conoz los pasos que ta dando la Izquierda Abertzale"

L'históricu dirixente de HB Tasio Erkizia reveló que'l PSOE conoz "de primer mano" los pasos que la izquierda abertzale ta dando na so apuesta peles víes puramente polítiques y precisó que "rescampla qu'hai víes de comunicación".

Amás, afirmó que la izquierda abertzale va tar "segurísimu" nes próximes elecciones y que "hai tiempu abondo" pa llogralo.
  
Nuna entrevista concedida a Radio Popular, recoyida por Europa Press, Erkizia manifestó que la izquierda abertzale "tomó una decisión que tien un determín claru de siguir apostando poles víes polítiques". "Y tamos convencíos de que la mayoría social y política d'esti pueblu ta apoyando esti procesu, y esa mayoría social y política d'esti pueblu, va obligar al Estáu a movese", añadió.
  
El representante de la izquierda abertzale apuntó que "les espresiones de violencia perxudiquen a la sociedá", non sólo a la izquierda abertzale "sinón a otros" tamién. "Que me digan a mi'l PNV o'l PSOE si toa esta situación d'enfrentamientu y d'espresiones de violencia del Estáu, y otres espresiones que tamién existieron d'ETA, nun preocupen y nun perxudiquen, perxudica a toos", indicó.
  
Por ello, destacó que "l'apuesta de la izquierda abertzale ye pa superar esa situación y p'asitiamos n'otros parámetros". Nesti sen, manifestó que "equí hai un problema políticu de fondu que quier tapase constantemente y ye qu'Euskal Herria tien una conciencia de nación y considérase una comunidá política que nun ve que les sos aspiraciones" se recueyan na Constitución o los estatutos.
  
Tres insistir en que se ta "a les puertes d'una nueva fase política" na que se reconoza'l derechu a decidir de los vascos, reclamó que "nun haya nenguna situación de violencia" pa lo que son necesaries "unes bases y una convivencia política", y apostó por que "toles opciones polítiques, incluyida la independentista", puean defendese y materializase.

Derechu d'autodetermín
Nesti sen, preguntó al presidente del Gobiernu, José Luis Rodríguez Zapatero, y al lehendakari, Patxi López, si tán dispuestos a reconocer el derechu al autodetermín, "piedra angular pa un futuru en paz".
  
Tasio Erkizia recordó qu'hai un añu qu'ETA "nun actúa", mientres la izquierda abertzale "fizo en Gernika un planteamientu bien claru y antes tamién". "Tamos diciendo mientres un añu casi que la nuesa apuesta ye inequívoca y que'l nuesu determín ye claru poles víes polítiques y democrátiques. Lo que pasa ye que nós somos rebeldes ante'l sistema, y el sistema nun quier más rebeldíes", indicó.
  
Por ello, pidió que se dexe al pueblu vascu "opinar y que diga qué quier de cara al futuru, y aceptemos el resultáu". "Nós tamos diciendo, dende l'entamu d'esti procesu, que'l Partíu Socialista conoz perfectamente los pasos que va dando la izquierda abertzale, conoz perfectamente les decisiones de la izquierda abertzale y conozlo de primer mano", calcó. Nesti sentíu, precisó que "hai víes de comunicación, ye evidente".

Crítiques al PNV
Coles mesmes, ratificóse en que, "por desgracia, en Madrid, ente'l PNV y el PSOE falóse y negocióse más que'l tema de los Presupuestos". "Falóse de cómo, d'alguna manera, bloquiar la iniciativa de la izquierda abertzale y de cómo dar ventaya al Estáu pa que l'Estáu faiga creer a la opinión pública española qu'esto tien una solución policial y que, a la fin, apreten tolo posible pa que, a lo último, paeza ante la sociedá como una derrota de la izquierda abertzale", manifestó.
 
Al so xuiciu, "eso nun ye ético y que'l PNV tien equí un gran llabor". "Tien una gran oportunidá y una gran responsabilidá, y ye que nun vale nadar ente dos agües", calcó, pa precisar que, "nesti momentu, hai una estratexa del Estáu p'afogar tolo que seya identidá vasca".
  
"Y nós, ante eso, plantegamos que tien qu'haber un acuerdu vascu sobre unos mínimos democráticos, onde la so espresión más clara ye la Declaración de Gernika, tien qu'algamar qu'haya un respetu de tolos derechos humanos, incluyíu'l derechu a poder desarrollar la política n'igualdá de condiciones de toles opciones, la independentista tamién", señaló.
  
Nesta llinia, esixó a la formación jeltzale "muéyase" y acusó al PNV de "mirar pa otra parte costantemente cuando se plantega'l respetu a los derechos humanos, hai una presión per parte del PSOE y un sector, polo menos del PNV, y la dirección nel so conxuntu, ta faciéndo-y el xuegu" al Partíu Socialista "pa bloquiar al máximu esa iniciativa de la izquierda abertzale".
 
"El PNV tien que dicir al Estáu: 'señores, equí hai que dar pasos per tolos llaos, y poro, hai qu'apostar claramente por un procesu democráticu, basáu nel diálogu y la negociación", manifestó.

Elecciones
Amás, destacó que "segurísimo" la izquierda abertzale va tar nes próximes elecciones y añadió que "hai tiempu abondo". "La izquierda abertzale, nestos momentos, nun tien que tener nengún tipu de problemes porque ta diciendo mientres meses qu'apuesta claramente poles víes polítiques y democrátiques", apuntó.
  
Tamién resaltó que "la mesma organización ETA ta dando pasos bien importantes", y afirmó que "equí namás hai un problema, que'l PSOE y el PP quieren utilizar les elecciones y la illegalización pa intereses puramente partidistes y, poro, falsos".
  
Nesti sen, recordó que socialistes y populares "tán teniendo, nestos momentos, un papel que nun-yos correspuende nes urnes" y que namás "algamaron a base de trampes". "Nós tamos convencíos de que vamos tar nes próximes elecciones y va algamalo'l pueblu. Sabemos que'l PSOE y el PP van facer lo imposible pa que nun teamos, y creemos que'l PNV tuvo tamién nesa dinámica", señaló.
  
Sicasí, mostró'l so convencimientu de que, "con too y con eso, va haber movilización popular bastante, músculu políticu nesti pueblu y rebeldía, pa que nes próximes elecciones" la izquierda abertzale pueda acudir.