Barreiro y la Orquesta Céltica Asturiana van tar presentes na UABRA

El periodista pon una charra mientres que la formación musical va dar un conciertu.

La Universidá Asturiana de Branu (UABRA), qu'entama l'Academia de la Llingua Asturiana en Cangas del Narcea, entra na so segunda selmana d'actividá, na que continúen los cursos básicu y avanzáu de Llingua Asturiana y comiencen dos nuevos dientro de la estaya d’Afondamientu Cultural y Llingüísticos. Éstos son ‘Xestión cultural n’Asturies: creando cultura a traviés de los medios’, coordináu por Isabel Hevia con un profesoráu formáu por Cristóbal Ruitiña, María Xosé Rodríguez López y Inaciu Galán, y ‘Asturies ente’l sieglu XX y XXI: tresformaciones sociales y culturales’, dirixíu por Rubén Vega y con un equipu conformáu por Marta Mori, Xune Elipe, Ana Vanessa Gutiérrez, Rafael Rodríguez Valdés, Faustino Zapico Álvarez y Marcos Rodríguez Alonso.

D'igual forma, pa estos díes tán previstes actividaes nueves dientro les xeres complementaries que s'entamen na UABRA. Asina, esta tarde a les 19 hores nel salón d'actos de la Escuela-Hogar, el periodista Damián Barreiro va poner la conferencia 'Llingua asturiana y espacios informativos na RTPA'.

Mañana la xornada va tar dedicada a lo musical y va contar col protagonismu de la Orquesta Céltica Asturiana, que va dar un conciertu al aire llibre si les condiciones meteorolóxiques lo permiten. Ésti ta previsto pa les 22.30 hores na plaza Conde Toreno, cola posibilidá de llevalo finalmente al Teatru Toreno si se cumplen les previsiones daes pola Axencia Estatal de Meteoroloxía (Aemet).

Na semeya, asistentes a una de les charres entamaes pola UABRA.