Barreiro presenta ‘Asturploitation’, l’ensayu col que ganó’l so segundu Máximo Fuertes Acevedo

La xixonesa Biblioteca Xovellanos acueye esti sábadu la presentación de ‘Asturploitation’, obra ganadora del XXIV Premiu Máximo Fuertes Acevedo, correspondiente al añu 2018, qu’edita Trabe. El so autor Damián Barreiro fai nella una propuesta estratéxica pal impulsu del sector audiovisual n’asturianu.

“El términu ‘blaxploitation’, aunión de les palabres ‘black’ (negru) y ‘exploitation’, en referencia al cine d’esplotación, da nome a un subxéneru de cine negru nacíu n’Estaos Xuníos nos años setenta del sieglu xx que tien a la comunidá afroamericana como protagonista principal, con escenes típiques y tópiques de persecuciones policiales en coche y música funk de fondu. Anque nació con un calter despectivu, ye verdá que col pasar del tiempu esti cine valió pa que pela primer vez la comunidá negra se sintiera identificada na pantalla y pa que la sociedá blanca avanzara y se fixera más tolerante al respective de la comunidá negra”, contestualiza la editorial.

Barreiro trai esti xuegu de pallabres a Asturies, exemplu que-y sirve de base “pa estudiar el pasáu y el presente del audiovisual n’asturianu”. Con una bona documentación, el periodista –ex redautor d’Asturies.com– repasa los sectores audiovisuales n’otres llingües del Estáu y fai una propuesta estratéxica “pa da-y impulsu y puxu a un sector bien importante pa que la xente asturfalante, y con ello toa Asturies, se sienta representao na pantalla”.

L’actu de presentación de ‘Asturploitation’ va celebrase mañana, a les 18 hores nel salón d’actos de la Biblioteca Pública Xovellanos. Xunto con Barreiro va tar presente’l cineasta Pablo A. Quiroga.

Tamién ‘Los llazos coloraos’

Alberto Vázquez García, autor de ‘Los llazos coloraos’, IX Premiu Alfonso Iglesias de cómic, correspondiente al añu 2017, va presentar el so trabayu, editáu tamién por Trabe, esta tarde en La Felguera. Va ser a les 19.30 hores nel Centro de Creación Escénica Carlos Álvarez-Novoa, actu nel que va participar el coleutivu Les Filanderes.