Barbón va centrase nel “trabayu municipal y depués vendrá lo autonómico”

|
Adrián Barbón rueda de prensa día depués del 26-M

“La nuesa prioridá ye configurar alcaldíes socialistes con alcuerdos de progresu pa frenar les polítiques de la derecha estrema”, afirmó Adrián Barbón, futuru presidente d’Asturies. La FSA-PSOE celebró’l llunes el conceyu del Comité Eleutoral y de la Comisión Executiva tres el bon resultáu socialista algamáu nes eleiciones del 26-M.

Tres la mesma, compareció’l secretariu xeneral del partíu p’anunciar que “agora priorizamos el trabayu municipal y depués vendrá lo autonómico”. Una Comisión formada por él mesmu, Gimena Llamedo y Iván Fernández va ponese a trabayar colos candidatos de los 17 conceyos onde los socialistes tienen opciones de gobiernu “pa estudiar la politica d’alcuerdos y de pautos a la hora de configurar gobiernos de progresu municipales, porque queremos ser frenu a la amenaza de la involución al haber conceyos d’Asturies que pueden cayer nes garres de la derecha estrema”.

Ún d’ellos ye Uviéu, onde un alcuerdu con Ciudadanos podría caltener a Francisco Wenceslao López al frente de l’alcaldía y evitar asina un gobiernu del PP, partíu más votáu. Dende la FSA nunca se refugaron posibles alcuerdos hacia la derecha, anque Barbón caltién la prioridá de mirar a la izquierda.

No que respeuta a la Xunta Xeneral, el llavianés cuenta con gobernar en solitariu con alcuerdos puntuales gracies a la fuercia que-y dan los 20 diputaos algamaos. Sicasí, la prioridá agora son los 17 conceyos con opciones de gobiernu pa sumar a los 38 onde los socialistes algamaron mayoría absoluta.

Contador Estadistiques