Barbón señala que la negociación de la reforma del Estatutu “va paralela” a la presupuestaria

La negociación del reforma del Estatutu “va paralela, porque nun se toca, nun tien nada que ver, cola presupuestaria d’Asturies qu’agora mesmu ye una prioridá porque Asturies necesita tener Presupuestos”, aseguró esti miércoles el presidente Adrián Barbón, un día después de los aconceyamientos colos grupos parllamentarios. Foro presentó un documentu coles sos propuestes pa les cuentes del 2022: "la pelota yá nun ta nel nuesu teyáu", apuntó Adrián Pumares.

Esta mesma afirmación fíxola ayeri, al final de la llarga xornada d’alcuentros, la conseyera de Facienda, Ana Cárcaba, que rescampló la “necesidá de falar de marcos de negociación diferentes”. Apuntó que nos axuntamientos pa los Presupuestos “siempre se planteguen propuestes fiscales por parte de los grupos, al igual qu’otres cuestiones rellaciones col restu de polítiques que son competencia del Gobiernu”, confirmando que “nun vamos afrontar una reforma fiscal fonda, anque siempre tamos abiertos a incorporar venceyaes a la fiscalidá que vayan lligaes a otres polítiques qu’apoya’l Gobiernu”.

La valoración global de les xuntes celebraes en Presidencia foi “positiva”. “Tolos grupos parllamentarios colos que nos sentamos amosaron una voluntá a negociar, a dialogar y a llegar a alcuerdos”, confirmó.

Ensin llinies coloraes

El diputáu y secretariu xeneral de Foro, Adrián Pumares, que tuvo acompañáu nel alcuentru pol asesor Jaime Fernández-Paíno, presentó al Gobiernu de la FSA un estensu documentu nel que se detallen les sos propuestes pa les cuentes del 2022 en cuestiones como fiscalidá, infraestructures, mediu rural, fomentu de la natalidá, atraición y retención de talentu, sanidá, educación, cultura, derechos sociales y coneutividá, ente elles les demandes anunciaes pa dar el votu 27 a la reforma del Estatutu d’Autonomía y la oficialidá. Llueu de l’aconceyamientu’l llavianés confirmó que nun marca llinies coloraes na negociación y, yá esta mañana, demandó lideralgu al Gobiernu y a la conseyera Cárcaba pa “la busca d’un alcuerdu y un consensu”.

“La pelota yá nun ta nel nuesu teyáu. Nós fiximos una serie de propuestes concretes y pa dalgunes d’elles el marcu afayadizu ye la negociación presupuestaria”, aseguró.

Na semeya, Pumares diríxese a Barbón nel aconceyamientu d'ayeri en Presidencia, con Fernández-Paíno a la so izquierda, y enfrente'l vicepresidente y conseyeru d'Alministración Autonómica, Mediu Ambiente y Cambiu Climáticu, Juan Cofiño; la vocera socialista na Xunta Xeneral, Dolores Carcedo; la secretaria d'Organización de la Federación Socialista Asturiana (FSA-PSOE), Gimena Llamedo; y Cárcaba.