Barbón reivindica la conmemoración del 25 de mayu pa “recuperar la nuestra historia”

“El Gobiernu del Principáu quier –y dígolo a les clares, ensin arrodeos– qu'esta conmemoración cale”, espresó n’asturianu'l presidente Adrián Barbón na so intervención pol 25 de mayu. En gallego-asturiano defendió referise a esta celebración como “el noso día da bandeira”, un símbolu “que salta por derriba das siglas y das ideoloxías”.

El presidente del país peslló xunto con Marcelino Marcos, presidente de la Xunta Xeneral, y Mario Arias, teniente d’alcalde d’Uviéu, énte l’ausencia del alcalde Alfredo Canteli, l’actu institucional nel Palaciu de los Condes de Toreno pa conmemorar el 25 de mayu del 1808, la xornada na que la Xunta Xeneral se proclamó soberana declarando la guerra a los franceses. Una fecha que, reivindica l’Executivu, “merece el conocimiento y el reconocimiento de todos los asturianos y asturianas”.

“Al recordallo, conmemoramos tamén os empezos da nosa bandeira, a mesma que vemos ondiar en cualquera acontecemento multitudinario, seña nel recanto del mundo que seña, y coa que nos identificamos axina. Eu mesmo escoyín bautizar el 25 M como el noso día da bandeira. Nun vou chufarme de ser historiador nin sociólogo, pro teño a convicción de qu'é un símbolo que xunta sin distinción a todos os asturianos y asturianas. Un símbolo que salta por derriba das siglas y das ideoloxías, que nun compite con identificacióis relixosas nin culturales. Tou convencido de que col paso dos anos tal día como hoi as bandeiras d'Asturias han a acabar enchendo os balcóis núa festa colectiva”, espresó darréu’l llavianés.

Nel so ampliu discursu rescampló tamién el so enfotu de que “esta conmemoración cale. Nun se trata de poner un día más en coloráu nel calendariu nin de competir col 8 de setiembre, sinón de daqué abondo más ambicioso: recuperar la nuestra historia, facer un llamáu a la nuestra autoestima, difundir qu'hai un motivu más, y potente como pocos, pa sentinos arguyosos d'Asturies”.