Barbón refuga entamar agora la reforma del Estatutu d'Autonomía

“Una vegada que la situación se controle –en referencia a la pandemia–, y frutu del diálogu, hai que facer posible esi debate serenu, sanu y abiertu colos grupos políticos” sobre la oficialidá. Nel programa ‘Asturias Hoy’, de RPA, Adrián Barbón respondió n’asturianu a una entruga al respeuto, tamién n’asturianu, y confirmó que refuga entamar agora la reforma del Estatutu.

Podemos presentó’l 18 de setiembre una propuesta a los grupos parllamentarios, cola esceición de VOX, p’abrir esti procesu pa incorporar la oficialidá del asturianu y del gallego-asturiano nesti mesmu periodu de sesiones, lo que’l socialista pospón hasta depués de superar la crisis sanitaria pol coronavirus SARS-CoV-2. “Habrá que falar de la oficialidá, y habrá que falar del modelu d’oficialidá, y habrá que falar de munches coses, pero pa eso necesítense votos. Recordemos que la reforma del Estatutu d’Automía son 27 votos pa facelo posible, asina que nesti momentu lo qu’hai que tar ye centraos na crisis, na pandemia, y evidentemente llueu, como tantes coses, habrá qu’afrontar esi debate”, señaló’l socialista, primer presidente dende Pedro de Silva qu’acudió a la Xunta Estraordinaria de l’Academia de la Llingua Asturiana (ALL) pol Día de les Lletres Asturianes, el vienres.

“Evidentemente hai que falar de cuál va ser el reconocimientu llingüísticu de la llingua asturiana, qu’hai que ponela en valor, qu’hai que protexela, y llevar alantre la reforma normativa que sía necesaria pa facelo posible”, un alderique que Barbón retrasa al momentu nel “que la situación se controle”, pa, dende’l diálogu “serenu, sanu y abiertu colos grupos políticos”, ver si “dende l’espectru de la derecha se dexa de tener esta obsesión antillingüística hacia l’asturianu que creo que ye un error, porque l’asturianu ye la llingua nuestra, ye la herencia de los nuestos güelos. Ye sinceramente un patrimoniu común de tolos asturianos y asturianes”.

Na semeya, Barbón el vienres na Xunta Estraordinaria de l'ALLA.