Barbón recomienda lleer a Xovellanos tres criticar en Madrid "el despreciu que reciben los intentos de protexer la nuesa cultura"

El presidente d’Asturies, Adrián Barbón, protagonizó esti llunes l’almuerzu informativu de Fórum Europa en Madrid, actividá entamada por Nueva Economía Fórum. Acompañáu de ministros de Pedro Sánchez y dellos conseyeros, criticó “el despreciu que reciben los intentos de protexer la nuesa cultura” y recomendó lleer la opinión de Xovellanos sobre la llingua asturiana.

La oficialidá del asturianu salió a escena nel Salón Medinaceli del Hotel Westin Palace nel turnu d'entrugues, en concreto por preguntas de Dolores Robles y del diputáu de VOX por Asturies, José María Figaredo. Enantes, na so intervención, el convidáu por esta “organización independiente d’alderique” defendió la cultura como motor económicu: “Asturies ha de responsabilizase de construyir l’horizonte propiu”, apuntó pa depués, tres refugar los nacionalismos supremacistes, señalar que “yo me declaro ayenu y vacunáu énte tales tentaciones, pero nun puedo dexar d’ablucar énte’l despreciu que reciben los intentos de protexer la nuesa cultura, incluyida la llingua. Pienso si eses reaiciones, a veces un puntu acomplexaes, nun serán otra espresión de la falta d’autoestima. O de miopía, porque la cultura tamién ye motor d’actividá económica y xeneración de riqueza. Añado-yos un exemplu: el prerrománicu asturianu ye un patrimoniu cultural del que sentise arguyosu, sí, pero sobre manera un potente xenerador de desarrollu económicu”.

“Como puntu de partida quiero recordar que pa qu’haya oficialidá necesítase qu’haya una mayoría necesaria na Xunta Xeneral, y paez que nun hai”, comenzó Barbón la so respuesta. “De toes maneres, l’alderique nun ye en sí la oficialidá sí o oficialidá non. Equí tresciende y hai otru tipu d’alderique, y dicíalo na mio intervención. Hai un alderique qu’a min me llama muncho l’atención sobre’l fechu de protexer o non la nuesa cultura, la nuesa tradición; la nuesa llingua, que ye un elementu, ensin dulda, identitariu. Dalgunos que falen que nun esistía, o que nunca esistió, que ye un inventu, oiga, Gaspar Melchor de Xovellanos facía una reivindicación nesi sentíu, qu’a dalgunos recomiendo que llean porque ye interesante conocer”, apuntó.

El socialista criticó darréu que, “si por dalgunos fuera, too gastu económicu en cultura ye un esperdiciu”, pa depués insistir en que “la riqueza cultural y el patrimoniu ye un elementu non sólo d’indentidá, sinón de crecimientu económicu”, y convidar a “un alderique asosegáu, de buscar puntos d’alcuentru, y sobre manera de nun faltar al respetu de la nuesa historia, de la nuesa identidá como asturianos”.

Contra la política fiscal de Madrid

Barbón, que viaxó a Madrid acompañáu de Berta Piñán, conseyera de Cultura, Política Llingüística y Turismu; el vicepresidente y conseyeru d’Infraestructures, Mediu Ambiente y Cambiu Climáticu; el conseyeru de Desarrollu Rural, Agroganadería y Pesca, Alejandro Calvo; y la conseyera de Presidencia, Rita Camblor, foi presentáu a los 300 asistentes del almuerzu informativu por Carmen Calvo, vicepresidenta d’España y ministra de Presidencia. Tamién acudieron al actu, el primeru del llavianés como presidente d’Asturies fuera del país, otros cuatro ministros (Reyes Maroto, Dolores Delgado, Fernando Grande-Marlaska y Margarita Robles), los diputaos por Asturies Adriana Lastra y Roberto García Morís, y los senadores por Asturies Fernando Lastra, Francisco Blanco y María Fernández Álvarez, amás de dellos cargos del PSOE y de la FSA.

Nel actu, el socialista cargó contra la política fiscal de Madrid, defendió una financiación autonómica solidaria, citó les ventayes d’Asturies pa la inversión y la so disposición de dar facilidaes pa la mesma, y afaló a protexer la industria y a una transición enerxética ensin costu llaboral.