Barbón reaiciona: va tratar la creación de la especialidá d’asturianu cola ministra Alegría

L'esmolecimientu esistente pol bloquéu que vive la creación de la especialidá docente d'asturianu lleva al presidente Adrián Barbón a encabezar la negociación con Pilar Alegría. La ministra va visitar Asturies por Les Escuelines.

Va ser el xueves cuando se produza l’alcuentru pa dar a conocer a la socialista’l proyeutu de la rede autonómica de 0 a 3 años. Una cita que Barbón quier aprovechar “pa que’l remanente qu’otres comunidaes autónomes nun tán faciendo, executando, consiguir que nos lo aplique a Asturies pa siguir ampliando esa rede d’escueles de 0 a 3”.

“Y amás otru tema que quiero plantegar a la ministra aprovechando esta visita, que sé qu’esmolez: la especialidá docente d’asturianu que, como saben, por nun tener reconocimientu d’oficialidá nun pue sacase alantre. Tamién quiero tener la oportunidá de falar direutamente con ella d’esti tema”, aseguró, encabezando asina la negociación col Ministeriu d’Educación, Formación Profesional y Deportes, agora bloquiada.

Alegría tresmitiera una vez más a lo último del mes pasáu a la conseyera d’Educación, Lydia Espina, la imposibilidá de crear la especialidá docente de Llingua Asturiana y Gallego-asturiano ensin oficialidá. Los sindicatos educativos consideren que lo qu’esiste realmente ye “falta de voluntá” y insisten en que ye posible modificar los reales decretos d’especialidá pa incluyir les llingües non oficiales con reconocimientu llegal nos estatutos d’autonomía.

Na semeya, Barbón conversa con María Salomé Samartino, alcaldesa de Caravia, onde güei se celebró'l Conseyu de Gobiernu.