Barbón pide a la población l’autoconfinamientu nuna fase 2 “actualizada a la realidá epidemiolóxica”

“Asturies vuelve a la fase 2 en rellación al plan de desescalada; una fase 2, eso sí actualizada a la realidá epidemiolóxica del momentu presente”, principió la so intervención Adrián Barbón pa comunicar les midíes nueves pa contener l’espardimientu del coronavirus SARS-CoV-2. El presidente pidió a la ciudadanía autoconfinamientu nos 15 díes próximos, nos que van siguir les alertes naranxes.

El conocimientu actual del comportamientu del microorganismu fai qu’esta fase 2 sía mui diferente a la de mayu. Barbón definióla como “un cortafueos pa facer más lenta y controlar la espansión del virus, siendo conscientes qu’esti tipu de midíes les tengamos que dir repitiendo de forma periodica a lo llargo de tola seronda y iviernu” según la evolución de la pandemia.

Ente les midíes qu’entraron en vigor esta medianueche pa los 15 díes próximos rescampla la prohibición de la celebración d’amagüestos –“actividaees lúdiques serondiegues” reza la resolución–, la imposibilidá pa la hostelería d’emplegar les barres y l’impedimentu de vender alcohol más allá de les 22 hores pa los comercios minoristes o d’usar les duches y vestuarios de los centros deportivos. Tamién s’afita la cifra de 6 persones non convivientes pa los axuntamientos de persones en llugares públicos o privaos.

Al empar, Barbón llamó “a la responsabilidá personal”, recomendando a la población a autoconfinase y llendar la so actividá social per estos 15 díes. “Que na midida de la posible, optemos por limitar los nuesos contautos sociales, centrándolos en venceyos estrechos, evitando espacios zarraos si queremos controlar la estensión de la comedia”, apuntó.

24 biltos activos.

El presidente confirmó que les alertes naranxes, los toques d’atención pola situación de la pandemia de COVID-19 en dellos llugares que siguen vixentes en Xixón, Ponga, Ḷḷena, Trubia (Uviéu), Mieres y Avilés, van caltenese daos los bonos resultaos algamaos n’otros conceyos del país. Otra manera, pasaos 15 díes de la entrada nesta fase 2 “modificada”, va revaluase’l momentu epidemiolóxicu pa graduar les midíes, cola posibilidá de poner otres más estrictes nel casu que nun dean resultáu, como'l pieslle d'hostelería y comerciu, aseguró’l llavianés.

Nestos momentos Asturies tien una incidencia de 166 casos por 100.000 habitantes, siendo la media estatal de 265. El númberu de biltos activos xube a 24, 2 más que la selmana pasada, de los que 18 son nuevos.

Na imaxe, el conseyeru de Salú, Pablo Ignacio Fernández Muñiz; Barbón; y Rafael Cofiño, direutor xeneral de Salú Pública. Semeya obra d'Armando Álvarez.