Barbón llama a la ciudadanía a tresformar "la frustración en fuercia p'afrontar el 2023"

El presidente insiste en pidir el votu pa los partíos que "apuesten de forma decidida pola reforma del Estatutu d'Autonomía y el reconocimientu de les llingües propies".

Esta vegada en Rusecu, onde acudió al actu 'Sobrescobio, capital de las montañas 2022', entamáu pola Asociación Española de Municipios de Montaña Esmontañas nel Centru Cultural Vicente Álvarez González de la capita de Sobrescobiu, Adrián Barbón tornó a falar, a entrugues de los periodistes, sobra les fallíes negociaciones pa modificar la norma autonómica y incluyir la oficialidá del asturianu y del gallego-asturiano. "Podemos quedanos de dos maneres", señaló Barbón, qu'enumeró primero tar "frustraos por tener 26 votos en llugar de 27 ensin pensar qu'hai 12 años namái había 4 votos favoratibles a la reforma del Estatutu y el reconocimientu de les llingües propies d'Asturies, y güei hai 26, y dicir '¡qué pena!'".

La otra opción valorada pol socialista ye "tresformar esa frustración n'esperanza y ilusión pa que les eleiciones del 2023 los ciudadanos y ciudadanes garren la papeleta d'aquellos partíos qu'apuesten de forma decidida pola reforma del Estatutu d'Autonomía y el reconocimientu, ente otres coses, de les llingües propies". Asina, citó "el reconocimientu de la capacidá d'autogobiernu real d'Asturies, que podamos convocar eleiciones ensin tener que dir con toles demás porque asina lo marca un llei; l'afondamientu nes nueses competencies, nos derechos de los ciudadanos... Esto ye, en munchísimes coses que taben en valor".

Por último, dirixóse otra vuelta a "los ciudadanos y ciudadanes que se sientan güei frustraos" pa pidi-yos "que tresformen esa frustración en fuercia p'afrontar el 2023", añu eleutoral n'Asturies.

Na imaxe, Barbón atiende esta mañana a los medios en Rusecu. Semeya obra d'Armando Álvarez.