Barbón espera que la sentencia del Constitucional lleve a “un cambiu d’actitú” del PP al respeuto del asturianu

Podemos aprovechó les entrugues al presidente Adrián Barbón esti miércoles en Plenu pa rescamplar la importancia de la sentencia del Tribunal Constitucional a favor del usu del asturianu na Xunta Xeneral. El socialista celebró la direición del mesma, de la que prefier nun facer un análisis hasta conocela, y espera que lleve a “un cambiu d’actitú” énte los contrarios al idioma, citando de manera espresa al PP.

“A min préstame ser rigurosu, nun la conozo. Conozo esclusivamente que se filtrara’l sentíu del fallu. Hasta que nun conoza la sentencia nun voi facer una valoración del so conteníu”, principió Barbón, qu'emplegó'l castellanu.

Sí quixo responder a les crítiques de la falta d’unanimidá, cola oposición d’una maxistrada. “Ye raro nun atopar una sentencia del Tribunal Constitucional que nun tenga un votu particular. Los qu’estudiamos Derechu sabemos qu’eso abonda siempre”.

“Dende llueu abrirá un marcu nuevu”, siguió, “y creo que será motivu d’un cambiu d’actitú d’aquellos que negaben una y otra vegada y que, inclusive, nesti casu miro pal PP, fixeron siguidismu de VOX a la hora de votar en contra de que se pudiera usar la llingua nesta Cámara”.

“Ye un día históricu”

Enantes el diputáu Daniel Ripa entamara les sos entrugues asegurando n'asturianu que “güei ye un día históricu porque ye la primer sesión de la Xunta Xeneral desque’l Tribunal Constitucional reconoció’l derechu de tolos miembros d’esta Cámara a usar con normalidá la llingua asturiana, polo que güei celebramos que s’ampliaren los derechos del conxuntu de la ciudadanía y que se punxere cotu a los que pretenden restrinxir el patrimoniu cultural d’esta comunidá autónoma”. Darréu solicitó “altor” pa convertir “el consensu social en defensa de la llingua asturiana y del gallego-asturiano en consensu institucional y aprobar la oficialidá. Güei ye un día históricu y ta nuesa mano que la llexislatura sía tamién histórica”.

Tamién sacó’l tema llueu Ignacio Blanco, diputáu de VOX, grupu que presentara’l recursu d’inconstitucionalidá de la modificación del Reglamentu de la Xunta Xeneral que permite l’usu del asturianu nel Parllamentu asturianu. “Yo tamién quería comentar dalgo de la sentencia del Tribunal Constitucional, una sentencia que nin siquiera nos notificaron a les partes. Pero bono, presenciamos güei un milagru nuevu de la xusticia española nel que dalgunos grupos políticos d’esta Cámara disponen de la sentencia y les partes nin siquiera la pudimos lleer”, señaló.

Na imaxe, una intervención de Barbón d'esta mañana. Semeya obra d'Armando Álvarez.