Barbón empondera una novela n'asturianu

Trátase de 'La colomina 36' de Nicolás Bardio, Premiu Asturies Moza de Narrativa 2019.

El presidente Adrián Barbón espublizó esta tarde un tweet nel qu'empondera esta obra y rescampla'l facer del autor nacíu n'Uviéu nel 1987. "Tenía munches ganes de lleer 'La colomina 36' de @nbardio. Prestome facelo, pos te engabita dende'l minutu unu. Cada páxina presta. Unu de los nuesos nuevos autores qu'escriben en llingua asturiana. Non una promesa futura, sinón presente" (sic), redautó.

Esta novela, la tercera de Bardio tres 'Sol reló' (2008, Trabe) y 'Cuando ensamen les abeyes' (2011, Suburbia), ye una ucronía que naz del universu del xuegu de rol 'Depués d'ochobre' –del que ye autor xunto con Xon Delacampa, responsable de les ilustraciones–, na que la Revolución d'Ochobre del 34 trunfa y Asturies pasa a formar parte de la Xunión de Repúbliques Socialistes Soviétiques. 'La colomina 36' (2020, Trabe) trata sobre un espía del KGB, Fabián, que tien como destín de la so primer misión una colomina deprimente d’un Mieres soviéticu na década de los 70.

Semeya xubida por Barbón en Twitter.