Barbón demanda al Gobiernu estatal que permita tamién la pesca deportiva y l’apertura de mercaos dende’l sábadu

El sábadu, 2 de mayu, el Gobiernu estatal va flexibilizar les restricciones pol estáu d’alarma por cuenta la pandemia de COVID-19, permitiendo los paseos y la práutica de deporte, como solicitara Adrián Barbón. El presidente pidió esti domingu que s’autorice tamién la pesca deportiva y los mercaos agroalimentarios.

El domingu pasáu Barbón yá treslladara na conferencia de presidentes, tres conocese que la reciella prodría salir dende’l 26 d’abril, que tuviera en cuenta la posibilidá de permitir les salíes a facer deporte o a la güerta, una práutica mui estendida n’Asturies. Depués de l’anuncia del sábadu los planes del Executivu estatal d’autorizar paseos y l’exerciciu físicu al aire llibre, con condiciones que se darán a conocer los díes próximos, el llavianés tornó a insistir ayeri nel mesmu foru coles demandes asturianes, a les que sumó otres dos con munchu raigón nel país, como ye la pesca deportiva o l’entamu de mercaos al aire llibre.

“Repití otros pidimientos que me paecen importantes, por exemplu lo que yá dixi nel so momentu: la salida a atender la güerta; la pesca deportiva podría ser otra variable, y l’apertura de los mercaos tradicionales d’Asturies al aire llibre sobre manera evidentemente na materia d’alimentación”, aseguró’l presidente. Tamién tornó a defender que la desescalada se faiga "cola flexibilidá debida", teniendo en cuenta la realidá de cada territoriu.

Otra manera, confirmó que nun va tar el xueves na Comisión Xeneral d’Autonomíes del Senáu, tando Asturies representada pola conseyera de Presidencia, Rita Camblor. “El deber ta enantes que’l placer. Prestábame conocer la dinámica del funcionamientu del Senáu y d’esta comisión en particular, pero como va ser un alderique ensin conclusiones decisorias paezme fundamental siguir estos díes n’Asturias y nun faltar nin un minutu a les mios obligaciones como presidente”, afirmó.

Semeya obra d'Armando Álvarez.