Barbón defende que nun se dexe entrar n’Asturies na desescalada

“Asturies necesita, na desescalada, que nun haya movilidá ente territorios en distinta situación de la epidemia”, señaló esti martes Adrián Barbón. El presidente del país defendió la continuidá del estáu d’alarma, alternativa xurídica única pa caltener la restricción de movimientos según el Gobiernu estatal, pa evitar biltos nuevos y nun “perxudicar a comunidaes como la d’Asturies”.

Esti miércoles va votase nel Congresu a propuesta del Executivu de coalición una prórroga nueva de la mesma, la cuarta. Na anterior VOX, Junts per Catalunya y CUP votaron en contra, posición que caltendrán y a la que yá confirmó que se va sumar ERC.

El PP, mentes, amenaza con retirar el so sofitu al estáu d’alarma, lo que provocaría que, de nun astenese y votar non, ésta nun s’aprobara. Una situación pa la que’l Gobiernu yá afirmó que nun tien plan B.

L’estáu d’alarma ye la única alternativa xurídica esistente pa evitar la restricción de movimientos de la población, apunten dende Moncloa, y la nun aprobación de la prórroga esmolez naquelles autonomíes nes que la pandemia de COVID-19 ta más controlada. “Asturies necesita, na desescalada, que nun haya movilidá ente territorios en distinta situación de la epidemia. Lo contrario, sería un riesgu. Y la resolución xurídica que meyor garantiza la llende de movilidá ente territorios, ye l’estáu d’alarma”, aseguró’l presidente asturianu esta mañana na so cuenta en Twitter, rede social onde ye mui activu.

"Ye una auténtica llocura"

Barbón, en respuesta a un usuariu que pidía quitar les restricciones y centrales namái na Comunidad de Madrid y Catalunya, añadió que “a min sólo me preocupa Asturies. Y reactivar la movilidá ente comunidades ye una auténtica llocura, lo único que provocará serán biltos nuevos y perxudicar a comunidaes como la d’Asturies. Nun puedo callar énte esta amenaza”.

Darréu esplicó la so “receta”, consistente en “reactivar la nuesa economía, reiniciándose actividaes, poniendo siempre per delantre la cuestión sanitaria. Salvar vides ye la prioridá. Y facelo con seguridá, ensin movilidá ente comunidades autónomes que teamos en diferente estáu epidemiolóxicu”.

Semeya obra d'Armando Álvarez.