Barbón critica la inaición de “dellos presidentes” con “repercusiones negatives pa la salú pública de los asturianos”

“Si fora presidente de determinada comunidá, determinaes comunidaes autónomes, colos datos epidemiolóxicos que tienen, pidiría l’estáu d’alarma na mio comunidá”, afirmó Adrián Barbón nuna referencia nidia a Madrid. El llavianés criticó que la inaición en dellos llugares tien “repercusiones negatives pa la salú pública de los asturianos” y ufrió la solidaridá y esperiencia d’Asturies.

Nuna convocatoria pa falar de la situación epidemiolóxica del país, con un empeoramientu progresivu de les cifres de la pandemia de COVID-19 nes selmanes últimes, Barbón principió recordando que foi “l’últimu presidente, y diría l’únicu, que quedó pidiendo cuando finalizó l’estáu d’alarma que s’ampliara 15 díes más p’aquelles comunidaes autónomes que taben en peor situación epidemiolóxica; refiérome a la Comunidad de Madrid, a Cataluña y a una parte de la comunidá autónoma de Castilla y León”, pa depués apuntar que “si s’allargara l’estáu d’alarma pa estes comunidaes y pasaren pela fase 3 de desescalada como’l restu de comunidaes, sería ensin dulda un aciertu”.

Nun quixo dexar pasar que d’aquella “fui criticáu, con acusaciones de ‘madrilanofobia’, precisamente por defender lo que quería meyor non sólo p’Asturies, dende llueu, sinón tamién pa España”. Darréu reclamó a los presidentes que “tomen decisiones como les adoptamos n’Asturies”, amosando la solidaridá del so Gobiernu a los “ciudadanos que peor lo tán pasando” y ufriendo “esperiencies, información y ayuda” a otros executivos autonómicos.

“Yo nun dormiría con esos datos”

El presidente nun tornó a tocar el tema hasta la fase de les entrugues de los periodistes, centráu na situación asturiana, pero nesa ocasión foi más contundente entá. “Si fora presidente de determinada comunidá, determinaes comunidaes autónomes, colos datos epidemiolóxicos que tienen, pidiría l’estáu d’alarma na mio comunidá”, afirmó nuna referencia nidia a la Comunidad Madrid, onde la pandemia ta anguaño descontrolada, coles peores cifres del Estáu, y a la so dirixente, la popular Isabel Díaz Ayuso.

“Yo nun dormiría colos datos de dalgunes comunidaes y me mantuviera ensin tomar decisiones”, apuntó. “Toi convencíu de qu’hai presidentes autonómicos, y presidentes autonómiques, que nun tomaron decisiones porque saben qu’eso xenera impopularidá. Cuando ún decide ser presidente del Principáu y pide la confianza de los ciudadanos y ciudadanes, ye pa exercer competencies y defender la salú pública”, añadió.

Poro, criticó una inaición de “dellos presidentes" que tien “repercusiones negatives pa la salú pública de los asturianos”. “Asturies nun ye una isla” y “la movilidá tien consecuencies”, incidió al tiempu que pidió a la ciudadanía “non baxar la guardia”.

Semeya obra d'Armando Álvarez.