Barbón convoca pal xueves a los voceros parllamentarios pa entamar les negociaciones de la reforma estatutaria

Esti xueves van entamar les negociaciones pa la reforma del Estatutu d’Autonomía que, ente otres cuestiones, incorporará la oficialidá del asturianu y del gallego-asturiano. Adrián Barbón anunció que va convocar a tolos voceros de los grupos parllamentarios en Presidencia pa esa xornada menos al de VOX y comunicó la so decisión de presentase a la reeleición como secretariu xeneral de la FSA-PSOE.

Foi n’El Puzu Funeres, onde’l partíu celebró’l sábadu’l tradicional actu d’homenaxe a les persones asesinaes pol franquismu y depositaes nesi llugar nel 1948. Llueu d’una intervención na que defendió los derechos y la llibertá de les persones, anunció a los medios presentes que’l xueves va tener la primer ronda de contautos colos voceros parllamentarios pa entamar les negociaciones pa la reforma estatutaria.

Nun va participar nes mesmes VOX, arrequexáu polos socialistes pola so posición antiautonomista. “Piensa que’l meyor Estatutu ye’l que nun esiste”, recordó Barbón.

El llavianés aprovechó la importancia que tien pal socialismu esti actu d’alcordanza a los represaliaos pol franquismu p’anunciar tamién la so intención de presentase a la reeleición como secretariu xeneral de cara al trentenu tercer congresu de la FSA que va tener llugar n'avientu. “El mio venceyu sentimental a Funeres y a la figura de Pablo García, el nuesu presidente d’honor y el mio maestru políticu, que m’enseñó’l camín a Funeres, fai tan importante y emocionante pa min tar equí que creo que’l llugar nel que tenía qu’anuncialo ye nesti espaciu”, aseguró.