Barbón censura a los que reivindiquen a Xovellanos y al empar “se dediquen a criticar la cultura y llingua d’Asturies”

“Ye llamativo; ye una cosa qu’amuesa que dacuando hai una imaxe preconcebida de Xovellanos poco estudiada por aquellos que lu reivindiquen”, añadió Adrián Barbón nel actu pol cincuentenu aniversariu del Muséu Casa Natal de Xovellanos. El presidente rescampló la pasión del ilustráu por Asturies y la so cultura.

El 6 d’agostu del 1971 abría les sos puertes esta instalación asitiada na casa que vio nacer a Gaspar Melchor de Xovellanos en Xixón, nel barriu de Cimavilla. Una vivienda convertida en muséu pa difundir, conservar y investigar el patrimoniu artísticu del conceyu, espuestu en gran parte nel llugar, y conmemora la vida y obra del xixonés.

Nel actu conmemorativu d’esta fecha acudió Barbón, que recordó la querencia de Xovellanos pa con Asturies, una pasión “que treslladaba con emoción sincera pol desendolcu económicu, pol futuru, pola cultura y pola llingua”. “Pola llingua”, calcó’l socialista, “porque dacuando siento a muncha xente reivindicar a Xovellanos que, al empar, se dediquen a criticar la cultura y la llingua d’Asturies. Ye llamativo; ye una cosa qu’amuesa que dacuando hai una imaxe preconcebida de Xovellanos poco estudiada por aquellos que lu reivindiquen”.

Na so intervención tamién recordó que Xovellanos “nun ye patrimoniu de naide, sinón patrimoniu de toos. Hai una tendencia n’Asturies por intentar facer patrimoniu personal de la figura de Xovellanos, dalgo que refugo porque ye patrimoniu común de la ciudadanía asturiana”.

Na semeya, Adrián Barbón, a la izquierda de l'alcaldesa Ana González Rodríguez, posa frente al retratu de Xovellanos pintáu por Goya nel 1782, cedíu pol Muséu de Belles Artes, que se va poder visitar na Casa Natal de Xovellanos hasta'l 12 de setiembre.