Barbón aconceya colos ministros d’Agricultura, Industria, Transición Ecolóxica y Presidencia

El presidente Adrián Barbón ta en Madrid entrevistándose con dellos ministros pa conocer les razones de la baxa execución presupuestaria y l’estáu de diferentes proyeutos estratéxicos pal país. Nesta primer xornada visitó a Luis Planas, Reyes Maroto, Teresa Ribera y Félix Bolaños, dexando pal segundu día a Raquel Sánchez, cola que va tratar les cuestiones d'especial relevancia.

Llueu de conocer los datos d’un informe de la Intervención Xeneral del Estáu que marcaba que la execución de les inversiones previstes nel 2021 n’Asturies yera del 40 por cientu, la segunda más baxa namái superada por Catalunya, el socialista comunicóse con Félix Bolaños, ministru de Presidencia, pa solicitar esplicación y organizó esta “maratón”, nes sos pallabres, d’alcuentros con responsables de diferentes carteres aprovechando’l so desplazamientu a Madrid p’acudir mañana al Patronato de la Fundación Princesa de Asturias. “Son unos datos absolutamente inaceptables”, afirmó a media mañana.

La primer parada de Barbón foi, a primer hora, el Ministeriu d’Agricultura, Pesca y Alimentación, pa repasar xunto con Planas el Proyeutu Estratéxicu pa la Recuperación y Tresformación Económica (PERTE) del sector agroalimentariu “y la necesidá d’apoyar a los nuesos agricultores y ganaderos”, asina como’l Plan Estratéxicu de la Política Agraria Común (PAC), ente otres cuestiones. Llueu desplazóse hasta’l Ministeriu d’Industria, Comerciu y Turismu, “clave pa los intereses d’Asturies”, pa vese con Maroto, pa siguir nel de Transición Ecolóxica y Retu Demográficu, onde lu esperaba Ribera, “pa trata tolo que tien que ver cola regasificadora de Xixón, ente otros munchos oxetivos, y espresar la nuesa posición sobre la xestión de diferentes especies como’l llobu”.

Finó esta primer xornada de la ronda nel complexu de La Moncloa pa entrevistase con Bolaños, responsable de Presidencia, pa tresllada-y “cuáles son les estratexes y cuáles son les prioridaes del Gobiernu del Principáu d’Asturies y poro del pueblu asturianu”. Mañana, a les 16 hores, va celebrase l’últimu alcuentru, con Sánchez Jiménez, ministra de Tresportes, Movilidá y Axenda Urbana, un xunta qu’anunció como “prollongada y llarga, porque ehí ta’l nudu gordianu de les inversiones que tengo que venir a esixir”, calcando sobre manera nel estáu de la velocidá alta ferriovaria.

Na semeya, Planas y Barbón a la salida del aconceyamientu na sede del Ministeriu d'Agricultura y Pesca.