Barbón ábrese al diálogu con Convocatoria por Asturies pa un posible alcuerdu de gobiernu

El presidente en funciones arrancó les conversaciones colos diferentes voceros parllamentarios, a esceición de la de VOX, de cara a la so investidura próxima.

"Tamos dando pasos en firme yá pa negociar un alcuerdu de gobiernu con Convocatoria por Asturias que permitiera la constitución d'un gobiernu d'unidá progresista", apuntó esta mañana Adrián Barbón llueu de los diferentes aconceyamientos, de los que rescampló "la voluntá de dialógos con tolos grupos políticos non sólo nos temes que vaya surdiendo, nes diferentes lleis o nos presupuestos del Principáu d'Asturies pa cada añu", sinón tamién "l'entendimientu nos temes que me treslladaron toos ellos como fundamentales, esos grandes retos que-yos dixi que formen parte de l'axenda asturiana y que, poro, van ser una constante per parte del Gobiernu d'Asturies".

Mentes, Ovidio Zapico, voceru de Convocatoria por Asturies, treslladó que'l socialista aceptó los criterios marcaos pola coalición p'abrir el diálogu pa la conformación del Executivu nun marcu que respeta les esixencies d'abrir toles árees de direición al proceso de diálogu, ensin zonas vedaes. "Toi en condiciones d'anunciar que podemos entamar a aconceyar les delegaciones de Convocatoria por Asturies y del Partido Socialista pa esplorar posibilidaes d'un gobiernu d'unidá progresista, d'un gobiernu plural, d'un gobiernu compartíu", aseguró.

L'apertura de negociaciones nun implica, esplicó, qu'haya alcuerdu. Lo que sí ta confirmáu ye l'apoyu de los trés diputaos de la coalición a Barbón na votación del Plenu, lo qu'asegura la proclamación del socialista'l vienres como presidente na segunda votación con una mayoría simple de 22 votos si nun algama la mayoría absoluta de 23 na primera del miércoles al nun presentase finalmente'l popular Diego Canga.

Na semeya, Zapico y Barbón enantes de l'aconceyamientu d'esta mañana.