Barbero recibe'l gallardón de la Tertulia Malory al meyor llibru n'asturianu del 2012 por 'La Chelita'

La novela gráfica ‘La Chelita’ resultó escoyida como meyor llibru n’asturianu del 2012 polos miembros de la Tertulia Malory. El so autor, Ruma Barbero, va recoyer el gallardón na tarde del vienres nel pub entreguín Tom Malory.

El xuráu formáu polos escritores Xulio Arbesú, José Luis Rendueles, Solina Turbón, Pablo Rodríguez Medina, Roberto Corte, David Fernán, Chechu García y Henrique G. Facuriella decidió’l pasáu 1 de payares otorgar la segunda edición d’esti premiu al xixonés pol so trabayu ‘La Chelita’, na que’l dibuxante y músicu cuenta la esperiencia de Charo, una amiga salmantina llicenciada en Psicoloxía que tuvo como cooperante n’El Salvador, onde trabayó na recopilación de datos pal Informe para la Comisión de la Verdad para El Salvador de les Naciones Xuníes. La Chelita, como la llamaben nel llugar, viaxó nun primer momentu al país centroamericanu p’ayudar na formación de profesores, pero la casualidá llevóla a collaborar cola organización pro-derechos humanos Madeleine Lagadec na ellaboración del informe qu’investigaba les violaciones más graves contra los derechos fundamentales del ser humanu mientres la Guerra Civil que vivió’l país ente’l 1980 y el 1992.

El llibru, de 160 páxines, avera a los llectores esta historia tráxica d’El Salvador y recueye testimonios autobiográficos y esperiencies humanes cola guerra y cola paz. Barbero decidió dividir la novela en trés partes: ‘El Salvador’, ‘La Chelita’ y ‘1992’. La primera trátase d’una esplicación del autor de cómo s’anició’l proyeutu y un repás a la historia d’El Salvador, solliñando los tiempos de la Guerra Civil. Darréu, el dibuxante xixonés cuenta la historia de Charo, p’acabar centrándose nel añu de la firma de los ‘Acuerdos de Paz de Chapultepec’ ente’l Gobiernu salvadoreñu y los guerrilleros del Frente Farabundo Martí para la Liberación Nacional.

L’actu d’entrega del premiu va celebrase a les 17.30 hores. Ésti consiste nuna ilustración d'Alfonso Zapico, una medaya d’oru conmemorativa y la merca de venti exemplares de ‘La Chelita’ pa ofrecer como regalu protocolariu nos actos organizaos pola Tertulia Malory, asina como naquéllos nos que participe. Esta tertulia lleva 15 años reuniéndose de forma selmanal y l’añu pasáu decidió otorgar un gallardón al meyor llibru del añu, que na primer edición, la del 2011, foi pa Xabiero Cayarga pola so obra ‘La ñeve del cuquiellu’. Con esta iniciativa, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n'asturianu.