Bandes de gaites asturianes, bretones y bercianes participen nel XXI Villa de Candás

Dende esti xueves y hasta’l domingu les gaites tomen Candás. Celébrase’l XXI Festival de Bandes de Gaites Villa de Candás, con representantes asturianos, bretones y bercianos, y conciertos de Corquiéu, Tuenda y la Bandina Los Gascones. L'actu central va tener llugar na nueche del sábadu en Les Conserveres.

Cada branu, dende l'añu 1997, la Banda Gaites Candás vien entamando esti certame, nel que miles de persones procedentes de toda Europa axúntense pa esfrutar d'una variada representación de les meyores bandes de gaites de tol mundu celta. Nesta ocasión van participar la Banda de Gaites El Gumial (Asturies), la Banda de Gaitas Castro Bérgidum (El Bierzu), la Bandina d'Escolinos de la B.G. Candás (Asturies), la Bagad Konk Kerne (Breizh) y la propia Banda Gaites Candás (Asturies).

L’actividá comienza a les 18.30 hores d’esta tarde cola inauguración del Mercáu Tradicional pola alcaldesa de Carreño, Amelia Fernández López, y un conciertu de la Banda Gaites Candás na plaza Hermanos Helio. Yá mañana, a les 19 hores, van facer un pasucais los pequeños de la banda candasina y, una hora más tarde, de la Bagad Konk Kerne con conciertos n’El Paseín y en La Baragaña, de manera respeutiva. L’actuación de Corquiéu va zarrar la xornada a medianueche, tamién en La Baragaña.

El sábadu, a les 13.30 hores, va percorrer la villa Castro Bérgidum, mentes qu’a les 19.30 hores van facelo, xunto colos bercianos, El Gumial, Candás y la Bagad Konk Kerne como previa al actu principal del festival, previstu a les 23 hores en Les Conserveres. Un pasucais nuevu de toles formaciones hacia La Baragaña va preceder al conciertu de Tuenda, previstu pa la 1.

El IV Concursu de Cuerpos de Percusión Villa de Candás, a les 13.30 hores, y el IV Concursu de Parayes y Tambor Villa de Candás Memorial Diego Alonso, a les 18 hores, van protagonizar l’actividá del domingu. El certame va zarrase con la Bandina Los Gascones, a les 20.30 hores, tamién en La Baragaña.