Bande estrena n’Asturies el gallardonáu documental ‘Equí y n’otru tiempu’

Esti xueves va proyeutase per primer vegada n’Asturies el documental ‘Equí y n’otru tiempu’ de Ramón Lluís Bande, gallardonáu col premiu de la crítica internacional FIPRESCI a la meyor película de la seición ‘Resistencias’ del Festival de Cine Europeo de Sevilla del 2014. El llugar escoyíu ye la sala de cine del avilesín Centru Niemeyer.

La cinta centra la mirada nos guerrilleros asturianos que s’echaron al monte ente ochobre del 1937 y payares del 1952 col oxetivu de salvar la vida y continuar cola resistencia al franquismu. Asina, Bande recupera nun primer momentu dalgunes semeyes antigües de dellos d’estos lluchadores pa principiar darréu con una muestra del presente de los llugares nos qu’hai constancia de que foron asesinaos munchos d’ellos. “Una historia poco conocida dientro y fuera d’España reflexada con rigor, orixinalidá y eficacia. El resultáu, un film lacónicu y emocionante que llogra tresformar la pantalla nun monumentu, consiguiendo caltener viva la memoria”, espuso’l xuráu de la Federación Internacional de la Prensa Cinematográfica (FIPRESCI) del Festival de Cine Europeo de Sevilla, onde se presentó de manera oficial ‘Equí y n’otru tiempu’.

Dos meses depués, y tres proyeutase en Barcelona, Madrid y Lanzarote, esti esperáu documental va poder vese n’Asturies nuna cita na que va tar presente Bande, que va ufrir un alderique col públicu. Va ser mañana, a les 20 hores, na sala de cine del Centru Niemeyer, con entraes a la venta a 4 euros, 2 pa los socios del Club Cultura Principáu d’Asturies. Na so estrena nel país, la cinta va disfrutase en llingua asturiana ensin subtítulos en castellanu.

Na semeya, Bande nel momentu de recoyer en Sevilla'l premiu de la crítica internacional FIPRESCI de la estaya 'Resistencias'.