Banda ancha con un paquete de pataques

Yá se faló delles veces nes páxines d'Asturies.com de la conexón inalámbrica a la internet, una tecnoloxía qu'equí ta en fase esperimental en conceyu Somiedu pero que n'otros llugares yá ta mui desarrollada. Ye'l casu de Londres, onde munches empreses quiten de tener que poner redes de cable per tola oficina recurriendo a esti sistema. Ello ye que bien de xente aprovecha que la conexón va vía radio pa piratiar ellos la señal y asina conectase gratis dende un local que tea cerca o dende la mesma cai con un portatil que venga preparáu pa trabayar con inalámbrico. Los hackers tamién puen aprovechar el furacu de seguridá qu'hai nes redes inalámbriques pa entrar nos ordenadores d'una empresa. Lo simpático ye que pa recibir la señal fai falta una antena, y, según cuenta esti reportaxe de la BBC, los más espabilaos acaben de descubrir que los tubos de les pataques Pringles son de lo más amañoso pa esti llabor…