Baiña y Porcía confirmen los carteles de les sos nueche folk

Col tiempu, estes dos localidaes asturianes, Porcia y Baiña,
supieron afitar nel almanaque festivu asturianu dos nueches folk, qu'añu
tres añu, aconceyen a un bon garapiellu de xente al rodiu de la
música asturiana.



Baiña, en Mieres, celebra esti vienres día 26 el
"Festival + o - Celta" con motivu de les fiestes de San
Bartolomé. La organización d'esta gran nueche celta, que llega
yá a la so VI edición, tien preparáu otra vuelta un cartel
de grupos folk. La nueche va llevanos per distintos estilos que se gasten na
música asturiana, por exemplu ellí van tar los históricos
Nuberu y la cantante Anabel Santiago xunta l'Asturiana Mining Company, bandes
la voz ye l'elementu protagonista, pero tamién vamos alcontrar a
La
Bandina y a La Coll.a Propinde que tienen un apueste daqué
más instrumental. El Conceyu de Mieres va poner autobuses curuxa a lo llargo de la nueche p'atender al públicu d'esta nueche folk.



Muncho más veterana ye la nueite folk de Porcia. Más de
venti años enllenando de música la islla fluvial qu'acueye la
nueche folk ye daqué de muncho méritu. Na edición
d'anguaño'l día 27 d'esti mes topamos otra ufierta musical que va
llevanos hasta'l conceyu d'El Franco nel occidente asturianu. Ellí, los
primeros n'actuar van ser la banda de gaites La Reina'l Truébano y el
grupu de baille El Cabazo pa dir caleciendo l'ambiente. Darréu d'estes
actuaciones van llegar los grupos folk. Ello ye que vamos topar a los locales
Cádaba, grupu que
tien el ñeru n'A Caridá y que yá actuaron en dalguna
ocasión nesta nueite folk. De más pal centru vienen el restu de
los grupos de la que siempre ye una llarga nueche que xunta col
amanecerín. Ello ye qu'en Porcia tamién vamos topar a La Bandina,
a Ambás y compañía con N'Arba y los carbayones
Gatos del Fornu.



En resume dos ufiertes musicales nún branu que va finando pero
qu'inda tien preparada dalguna sorpresa más enantes d'acabar.