Bacotexo va actuar el sábadu na Noite Rock de Valdepares

La banda de rock en gallego-asturiano Bacotexo va participar na Noite Rock de Valdepares, eventu qu’abre les fiestes de San Bartolo. Xunto cola banda de Tapia van actuar frente les escueles llocales Calcio-20, A Sekas y Malvaseda.

Con dos discos editaos, ‘A máquina del tempo’ y ‘Homes invisibles’, Bacotexo ye la banda rock referente en fala. El grupu nació en Tapia nel 2007 con una formación compuesta por Daniel García (batería y voz), Marcos Nogueiro (guitarra y voz) y Ricardo Saavedra (baxu), y destaca pola calidá de les sos lletres y pol so soníu, que toca dellos palos dientro del rock. Tres llegar a la final del occidente del concursu FestiAmas celebrada en mayu en Cangas del Narcea, acuden agora a Valdepares pa descargar tola so potencia musical.

La población del Conceyu d’El Franco celebra les fiestes de San Bartolo y na primer xornada apuesten por una Noite Rock na que Bacotexo va compartir escenariu con otres trés bandes asturianes: Malvaseda, A Sekas y Calcio-20. Los conciertos van principiar a les 23 hores, pero enantes, pa garrar fuercies, ta prevista una espicha a un preciu de 10 euros. Ésta va dar comienzu a les 21 hores y los vales yá tan a la venta nel autoserviciu Casa Sara, nel Mesón El Fornello y nel Bodegón El Pozo.

Na semeya, Nogueiro, Saavedra y García.