BA y UNA critiquen la renuncia de la Conseyería sobre Lorient

La respuesta nun tardó en llegar. Bloque por Asturies y Unidá Nacionalista Asturiana posicionáronse con dures crítiques hacia l’arrenunciu de la Conseyería de Cultura a qu’Asturies seya capital del Festival Intercélticu de Lorient en 2011.

En distintes notes de prensa, BA y UNA criticaron la decisión gubernamental. Bloque por Asturies calificó a Mercedes Álvarez de “conseyera de la incultura y la incapacidá”, mentantu qu’UNA, al traviés del voceru de Cultura Ignaciu Llope, argumenta que la decisión del Principáu de PSOE y IX respuende a “una fobia ideolóxica escontra too lo que tenga que ver cola identidá asturiana”.

Les dos formaciones llamenten la disculpa de los 350.000 euros de presupuestu y criticaron el “marafundiu” de perres n’otres actuaciones “difícilmente xustificables” como les de La Laboral, o’l actu “casposu y ranciu de la España cañí” del 8 setiembre. El Bloque tamién señaló que 350.000 ye “ye una tercera parte de lo qu’ingresa’l grupu parlamentariu socialista tolos años na Xunta Xeneral del Principáu”

Una pérdida económica
Tampoco faltó la denuncia a les pérdides económiques y de prestixu que trai qu’Asturies seya la protagonista d’un festival que mueve a más de 850.000 persones. “Ye perdifícil atopar un ámbitu de cuasi un millón de persones onde la cultura, la llingua asturiana, los artistes y les iniciatives asturianes puedan tener una meyor promoción, lo que tien una importante repercusión na nuesa economía”, insitió Llope.

Dende’l Bloque por Asturies tamién señalaron qu’en Lorient “l’interés ye más que’l cultural, ellí fainse negocios y véndese la imaxe del nuestru país a miles de persones directamente y a millones de manera indirecta” y destacaron que nesti eventu “triunfaron milenta artistes asturianos a nivel internacional y sirvió pa promocionar el turismu y los productos de la tierra”.