BA pide les comparecencies d'Areces, Migoya y Sastre nel Parlamentu

El Bloque por Asturies pidió esti miércoles la comparecencia na Xunta Xeneral de Vicente Álvarez Areces, Ana Rosa Migoya y Herminio Sastre, sobre’l casu de supuestes axudicaciones irregulares na que detuvieron al ex conseyeru Riopedre.

Asina, BA solicitó esta mañana, al traviés del so diputáu Roberto Colunga, que'l presidente asturianu, la conseyera d’Alministraciones Públiques y el conseyeru d’Educación y Ciencia, comparezan nel parlamentu asturianu "ante la evidente alarma social creada pola detención del ex conseyeru José Luis Iglesias Riopedre y graves imputaciones por delitos de prevaricación, sobornu, tráficu d'influencies, fraudes y exacciones illegales y negociaciones prohibíes pa funcionarios".   
  
D'esta manera, Bloque por Asturies esixe que s'informe "con tolos detalles" de los datos de los que se disponga sobre esti casu, si se pon en marcha dalgún procesu d'investigación interna na Alministración del Principáu y sobre los controles alministrativos y políticos.
  
El Bloque por Asturies pide tamién con calter "urxente ya inmediatu" la convocatoria de les comisiones d'Alministraciones Públiques y Educación y Ciencia, pa que comparezan ante elles, la Conseyera d'Alministraciones Públiques y Vocera del Gobiernu, Ana Rosa Migoya, y el Conseyeru d'Educación y Ciencia, Herminio Sastre.
  
Esclarar conocimientu
BA considera "indispensable" esclarar "de forma inmediata" si'l Gobiernu autonómicu conocía "les irregularidaes o la investigación de les mesmes, nel momentu de la dimisión de Riopedre como Conseyeru, n'agostu del pasáu añu".
  
"Ye indispensable, amás, esclarar les responsabilidaes polítiques de la Conseyera d'Alministraciones Públiques y Vocera del Gobiernu, Ana Rosa Migoya, dao que'l so nome apaez rellacionáu de forma sistemática colos altos cargos y funcionarios investigaos".
  
El Bloque por Asturies califica de "gota que 'colma' el vasu" estes detenciones que "vienen sumase a les continues sentencies contra'l Gobiernu del Principáu, en materia llaboral y de contrataciones, xunto colos permanentes sobrecostos nes obres públiques", acaba.