BA píde-y al BNG que collabore pa reforciar l’exe cantábricu y dexe la política agresiva

El Bloque por Asturies (BA) organización socia d'Izquierda Xunida nel executivu asturianu, fizo ayeri un llamáu al Bloque Nacionalista Gallegu (BNG) pa que la organización gallega "dexe la so política agresiva de xestos inútiles " pa que trabaye en comuña col envís de "reforciar l'exe cantábricu dende la solidaridá y el respetu a la identidá de cada Comunidá".

Según el comunicáu de la dirección nacional del BA, col que la organización quier acutar la so posición nel debate deriváu de la propuesta d'estatutu d'autonomía gallegu del BNG que propón l'amestadura de conceyos gallegos a Asturies, la nuestra comunidá y la de Galicia caltienen históricamente llazos en común lo mesmo sociales qu'económicos y culturales "incuestionables" y asina tien de ser nel futuru en cuantes que "plantegar desafíos ensin xacíu y ensin futuru namás pue llevar a una situación de recelu" qu'amás según el BA "reforciaría les posiciones polítiques del nacionalismu español y de la derecha oportunista".

Pal BA, incluso careciendo l'abandonu "inxustificable" qu'en munches ocasiones sufrió l'occidente asturianu, los vecinos d'estos conceyos "siguen amosándose arguyosos de la so condición d'asturianos y de la so identidá llingüística y cultural". Pa la formación política que representa roberto Colunga "Ye induldable y incuestionable, dende cualquier puntu de vista, l'asturianidá cultural y política del territoriu del Eo-Navia y de los conceyos que faen l'Occidente asturianu", amestando a ello que "cualquier propuesta que se faiga ensin tener en cuenta a los ciudadanos y ciudadanes nun dexa de ser una impostura, un xestu inútil y agresivu de cara a la galería" polo que-y pide al BNG que respete la voluntá d'estos territorios y abandone una posición propia del "nacionalismu románticu del sieglu XIX" y s'asitie nel sieglu XXI, un tiempu que pal Bloque por Asturies "ye'l tiempu de los nacionalismos cívicos y del diálogu ente comunidaes". Pal Bloque por Asturies "la llingua asturiana y el gallego- asturianu tienen de ser atendíos, protexíos y tresmitíos como parte irrenunciable del patrimoniu cultural asturianu" y polo tanto dambes variantes idiomátiques han vese reconocíes cola cooficialidá na próxima reforma del Estatutu d'Autonomía.