Aznar llama a reformar el modelu autonómicu

L'ex presidente del Gobiernu español José María Aznar reclamó esti llunes una "fonda reforma" del modelu territorial porque, según él, “España nun puede competir fuera con CCAA que quieren ser mini-Estaos”.

Aznar, xustificó la so posición con trés razones: siguir cuntando n'Europa y nun quedar fuera de les grandes decisiones europees; asegurar la sociedá del bienestar; y facer dafechu vixente la Constitución de 1978.

Al so entender, España nun puede amosase hacia l'esterior como un territoriu estazáu, engarráu ya inseguru" nin puede competir n'Europa y nel mundu "con unes comunidaes autónomes aspirando a convertise en mini-Estaos".
  
L’ex presidente fixo estes manifestaciones mientres la presentación del informe de FAES 'Por un Estáu autonómicu racional y vidable'. Tamién participaron na presentación la secretaria xeneral del PP, María Dolores de Cospedal, y el candidatu del PP a l'alcaldía de Sevilla, Juan Ignacio Zoido.
  
Ente los asistentes, atopábase'l presidente fundador, Manuel Fraga; el candidatu del PP a la Presidencia de Baleares, José Ramón Bauzá; la candidata por Asturies, Isabel Pérez-Espinosa; la teniente d'alcalde del Conceyu de Madrid, Ana Botella; y el vicepresidente del Gobiernu de Madrid, Ignacio González.

L'exemplu d'Alemaña
Aznar ve "inaplazable" desendolcar un alderique serio y fondo sobre l'Estáu autonómicu y quixo dexar claro que nun se trata d'un asuntu local sinón que ye un asuntu de política nacional y europea, cuidao que nel nuevu contestu européu, "con esixencies perentorias, el rendimientu económicu ya institucional d'España tien d'ameyorar sustancialmente".
  
Nesti puntu, recordó qu'Alemaña, con unos estaos federaos con "menos competencies que les CCAA n'España, llegó a la conclusión de qu'el so modelu d'organización territorial precisaba reformes". Según añadió, les dos grandes fuerces polítiques alemanes alcordaron una reforma constitucional, un exemplu de cómo pueden faese bien les coses nuna nación europea".
  
Aznar afirmó que pensar que basta con siguir faciendo política de “vuelu curtiu" col modelu autonómicu "sería cenciellamente dar el llombu a los problemes", daqué qu’al so xuiciu, vinieron faciendo n'España los que teníen qu'encetalos, en referencia a los socialistes.
 
"Nesti alderique, confieso que cuesta recibir llecciones de autonomismo de los que nun dexaron de proclamar que'l modelu autonómicu de la Constitución ye una fórmula caduca ya inclusive una torga pa la convivencia --sorrayó--. Refiérome al nacionalismu independentista y a la izquierda que buscó’l desbordamiento de la Constitución pa imponer pela puerta d’atrás una fórmula confederal n'España".