Axenda de pieslle de campaña

Les formaciones polítiques asturianes echen esta nueche'l piesllu a la campaña electoral con actos espardíos per tola xeografía del país. El PSOE escoyó la plaza del Carbayín, en La Corredoria (Uviéu) pa echar el piesllu a quince díes de campaña con xuegos pa la reciella y actuaciones musicales acompañando les intervenciones de la candidata a l'alcaldía Paloma Sainz, el secretariu de la FSA-PSOE y númberu dos na llista autonómica Javier Fernández, y el candidatu a la Presidencia Vicente Alvarez Areces.

El PP, pola so parte, pieslla campaña en Villaviciosa dende les 9 de la nueche nes instalaciones de San Xuan de San Juan de Capistrano, pa facer darréu una espicha nel llagar El Gobernador.



Pela parte de la candidatura d'Izquierda Xnida-Bloque por Asturies-Los Verdes, el so candidatu Jesús Iglesias va acabar la campaña electoral pasando per Avilés a les 19.15h pa una una espicha popular na plaza Carlos Lobo. El candidatu va colar darréu pa Xíxón, onde va facese un actu final nel llagar Trabanco coles intervenciones de Jesús Iglesias, Francisco Javier García Valledor, Nacho González, Rafael Palacios, Jesús Montes Estrada o Aurelio Martín. La coalición tien tamién un actu de pieslle n'Uviéu, con una folixa de fin de campaña que va tener llugar na sala La Santa Sebe .



Pela parte de les formaciones asturianistes y nacionalistes que se presenten a estes elecciones autonómiques, la llista de la coalición URAS-PAS va zarrar campaña con un mitin nel Centru Municipal de L'Arena de Xixón cola participación de los sos líderes Sergio Marqués y Xuan Xosé Sánchez Vicente.

D'otra manera, la coalición Unidá va rematar la campaña en Piloña, onde va facese dende les 8 de la tarde un actu políticu coles intervenciones de José Angel García "Allende", candidatu a l'alcaldía de Piloña, Germán Abad, candidatu pola circunscripción oriental y Ignaciu Llope, candidatu pola circunscripción central. Darréu van ticar los grupos "Skama la Rede" y "Llangres".

P'acabar, la formación Andecha Astur va zarrar campaña en Noreña con un actu a les 22:00 hores na Sala polivalente del conceyu coles participaciones de Pablo Ríos, canidadatu a la presidencia d'Asturies, y Mariu Arbesú, candidatu a l'alcaldía de Noreña.