L’Aconceyamientu de Xuristes pol Asturianu (AXA) presentó la candidatura del Conceyu por Otra Función Pública n’Asturies (COFPA) pal ‘Amparu de Derechos y Llibertaes’. Amás, encamienta a la Procuradora a que nun participe nel xuráu.
Esti coleutivu fundáu pa trabayar pol desaniciu de les torgues que tien la llingua asturiana n’actividá profesional de los xuristes, propón al COFPA pa esti premiu pol so llabor “na defensa del derechu humanu d’aportar a los puestos de trabayu en condiciones d’igualdá” reconocíu na Declaración Universal de los Derechos Humanos. AXA destaca’l so trabayu dende la so creación nel 2008 y la repercusión que tuvo nos medios de comunicación, con actuaciones contra la propia Procuraduría Xeneral, convocante del premiu ‘Amparo de Derechos y Llibertaes, o nes que tala institución ta afeutada. Por ello, AXA encamienta a la Procuradora Xeneral, María Antonia Fernández Felgueroso, “s’astenga a intervenir en cualquier estaya de la concesión d’esti premiu” pa mantener la imparcialidá nel so fallu.
Esti premiu, que pretende galardonar entidaes ensin ánimu d’arriquecimientu que trabayen na defensa de los derechos humanos, nació con polémica al señalar la Procuraduría Xeneral nes sos bases que les candidatures debíen ser en castellanu, ensin aceutar l’asturianu o cualquier otru idioma. De siguío, AXA presentó un recursu qu’obligó a Fernández Felgueroso a echase atrás y aceptar candidatures en llingua asturiana.