Avilés vive la so quinta Folixa de Navidá

Xuntanza Avilés asume'l mayor pesu organizativu de la fiesta cola que'l conceyu recibe'l periodu navidiegu. L'Anguleru va tar presente al traviés d'una conexón en direuto.

En cuatro años la Folixa de Navidá consiguió consolidase como ún de los eventos con más aceptación n'Avilés nestes feches tan especiales, sobre manera pa la reciella. Esta tarde vive dende les 19 hores la so quinta edición col oxetivu de siguir dando a conocer ente los más pequeños y los sos familiares "la nuestra rica cultura pesquera y recuperar tradiciones navidiegues asturianes como'l nataliegu (tueru de Navidá asturiano) y el ramu nadal".

La Estaya de la Llingua d’Avilés, entidá responsable d'esti actu, cuenta cola collaboración, amás de Xuntanza Avilés, de l'Asociación Cultural Garabuxada y el Teatru Santa Bárbara de Llaranes. Esta formación va encargase de representar de dar vida a la tradicional Ufrenda'l Nataliegu con una pequeña obra onde los trasgos enllenarán de maxa l'Auditoriu de la Casa de la Cultura d'Avilés.

La Confitería Vidal regala los Bollinos del Nataliegu que les escolines y escolinos del Colexu Públicu Marcelo Gago van ufrir al tueru de Navidá asturianu como símbolu de prosperidá del periodo nuevu de lluz qu'abre el solsticiu d'iviernu. "Esti pan dulce ye una reconstrucción de les referencias etnográfiques de Xuan Xosé Fernández-Piloñeta que recueye la costume asturiana de facer bollinos dulces pa los neños la nueche de Navidá (Nuechebona)", espliquen dende la organización.

Presencia de los Sidros

Olga Cuervo, acompañada de David Varela, va representar el cuentu del maestru avilesín Víctor Raúl Pintado 'Vitu' entituláu 'Un osu perfadiosu', qu'intenta recuperar la tradición de los antiguos aguilandos o mazcaraes d’iviernu. Por esti motivu, convidóse a participar a los Sidros de Valdesoto.

Amás de del Marcelo Gago, na Folixa de Navidá tamién van tar presentes alumnes y alumnos del Colexu Públicu Sabugo, que van protagonizar l'apartáu de 'Poemariu', y del Colexu Públicu La Carriona-Miranda, que va facer lo propio nel Conciertu la Reciella. Toos ellos van poder disfrutar de la presencia de los Llendadores de Ríu y d'una conexón en direuto de L'Anguleru, que yá ta preparando'l so viaxe pel Atlánticu pa llegar en Nuechebona a Asturies y repartir regalos ente toles neñes y neños asturianos.

Nel actu, amás, va entregase a títulu póstomu a María González González 'La Maizona' el premiu Maestra Llendadora 2019, "homenaxe que quier ser un reconocimientu a toles muyeres dedicaes al mundu de la pesca pela primer metá del sieglu XX, por ser una parte de la esencia de la nuesa tradición pesquera avilesina, munches vegaes escaecida. La Folixa de Navidá va finar col Asasayu de Llendadores, castañes de chicolate pa toles neñes y niños y tarxetes pa escribir a L’Anguleru, cola posibilidá de sacase semeyes con Lolina la Rulera y Xesús el Ruleru.