Avilés retoma la celebración de la seronda

|
Cartelu XVIII Seronda n'Avilés

Charres, animación, castañes amagostaes y sidra dulce protagonicen esta fin de selmana.

Torna Seronda n'Avilés, na so decimoctava edición depués del añu de parón obligada, con un formatu más reducíu, pero cola ilusión que tien toda vuelta. Xuntanza Avilés programa delles actividaes pa güei y mañana con sede nel Palaciu de Valdecarzana y na plaza Les Aceñes, de manera respeutiva.

Fe Santoveña va abrir a les 18.30 hores l'actividá cola charra 'La fiesta: ente'l ritu, l'ociu y el negociu', pa siguir con trés comunicaciones: 'Una señora fiesta. El casu de Piloña', por Rodrigo Cuevas; 'El modelu festivu del oriente d'Asturies', por Yolanda Cerra; y 'El calendariu festivu avilesín', de Rubén Arias. Toes van poder siguise en direuto al traviés de YouTube, asina como l'alderique final.

Yá mañana al meudía, nel otru allugamientu, va entamase una charra-amuesa, de títulu 'Mirar poles persones, mirar pola tradición. El compromisu etnográficu y social del Archivu de la Tradición Oral d'Ambás', a cargu de Carlos Suari, Ramsés Ilesies, Xosé Antón Fernández 'Ambás' y un representante d'Escontra'l Raigañu. Amás va haber animación con música popular y bailles, y, como nun podía ser d'otra manera, castañes amagostaes y sidra dulce.

Na semeya, un momentu de la Nueche en Danza de l'anterior edición de la Seronda n'Avilés, celebrada nel 2019.

Contador Estadistiques