Avilés propón trés paseos virtuales n'asturianu per dos puntos del conceyu

La iniciativa 'Pa que nun t'aburras' de la Estaya de la Llingua entama delles actividaes p'adultos pa siguir dende casa.

Tres colgar ayeri una salida al edificiu La Noria del parque Ferrera, güei ye'l turnu de los árboles más emblemáticos de la cultura asturiana esistentes nesta zona verde d'Avilés. Asina, texos, carbayos y fayes, ente otros, van protagonizar la visita guiada que se va estrenar a les 17 hores.

La tercer escapada prevista va tener llugar mañana y va consistir nuna ruta per Sabugo, el parque del Muelle y la ría. 'Pa que nun t'aburras: cocina, visita y CaleyAvilés', qu'empezó'l llunes con talleres de cocina vegana por Susana Sela, va completase'l vienres con una esposición virtual de la cartelería fecha pol ilustrador, escritor y académicu Miguel Solís pa diferentes ediciones de les Xuntes d’Escolines y Escolinos.

Toles actividaes ábrense a les 17 hores y pueden siguise nes páxines web del Conceyu d'Avilés, de la Estaya de la Llingua o de la Fundación Municipal de Cultura. Nelles tamién tán disponibles los eventos pasaos.