Avilés atecha los I Alcuentros de los servicios locales de normalización llingüística

Los nueve servicios de normalización del asturianu que funcionen n'Asturies van celebrar una xornada de trabayu pa poner en comuña les sos esperiencies y esixencies con vistes al futuru.

La Rede de Normalización Llingüística Municipal, que nació nel añu 2004 col oxetivu de descentralizar y comprometer a les alministraciones locales nel envís de normalizar sociollingüísticamente, tien anguaño 9 entidaes asociaes: Xixón, Avilés, Siero, Llangréu, Mancomunidá de la Comarca la Sidra, Mancomunidá del Cabu Peñes, Cangas del Narcea, y L.lena son los nueve conceyos y organismos supramunicipales que la faen, representando a trece conceyos nos que viven más de 550.000 habitantes, dalgo más del 50% de la población del País.

Caún de los servicios representa realidaes sociollingüístiques estremaes, con distintos graos d'usu de la llingua, rempuestes distintes ciudadanes, técniques y polítiques, táctiques y estratexes distintes, unes diferiencies que xustifiquen la celebración d'estos alcuentros n'Avilés, dende au la oficina municipal de normalización "La nuestra Estaya" que dirixe Cesáreo García quier celebrar esti sábadu 8 una xornada trabayu intensiva que valga p'analizar l'estáu de la cuestión, el futuru inmediatu d'una Rede en desenrollu, que se define na presentación del programa como "necesaria pero, aparentemente, fráxil".

El refuerzu d´unos profesionales voluntariosos y munches de veces en precario y la ellaboración d'unos Planes de Normalización Sociollingüística locales que valgan p'afitar aquel y pa dar discursu operativu y continuáu a los Servicios agora esistentes y los que tean d'esistir son los dos puntos que van centrar el debate nuna xornada que va entamar el sábadu a les 10 de la mañana en Palaciu de Valdecarzana y que va rematar a les 8 de la tarde. L'actuación musical de Chus Pedro va echar el piesllu.