Avilés aprueba la toponimia y la Xunta responde a les crítiques

El Conseyu del Gobiernu aprobó esti miércoles la toponimia oficial d’Avilés. Hasta agora, 48 conceyos completaron un procesu de normalización toponímica. Per otru llau, la XPDLLA argumentó contra les postures contraries.

Cola última actuación n’Avilés yá son 48 los conceyos que tienen aprobada la so toponimia oficial. El Gobiernu asturianu señala, en nota de prensa, que "avanza nel so oxetivu de completar el procesu de revisión nos 78 conceyos asturianos pa recuperar la toponimia popular y incorporar progresivamente los nuevos topónimos oficiales a la señalización vial".
  
Como frutu d'esti trabayu conxuntu, son casi 15.000 los topónimos tradicionales recuperaos dende qu'en mayu del 2005 se publicara nel Boletín Oficial del Principáu d'Asturies los primeros decretos de oficialización toponímica. Nesti momentu, otros 15 conceyos tienen abiertu'l so espediente que s'alcuentra en distintes fases de tramitación.

La Xunta argumentó contra postures contraries
La Xunta pola Defensa de la Llingua Asturiana (XPDLLA) exixó güei al Gobiernu asturianu que caltenga'l topónimu oficial de Quimarán pa esta parroquia de Carreño, en cuenta de recuperar Guimarán, como pide l'asociación de vecinos de la zona.
  
Al traviés d'un comunicáu, la Xunta mostró'l so apoyu "a la toponimia tradicional frente al caciquismu y la manipulación". Refugó asina les "práctiques que dellos caciques llocales lleven poniendo en práctica nestos meses en dos parroquies del conceyu Carreño, col fin de valtar el procesu técnicu, científicu y democráticu pol que s'establez la toponimia tradicional d'Asturies".
  
"Una sociedá que se diz civilizada nun pue pemitir que los argumento viciaos, sesgaos y acientíficos salgan trunfantes nin nesti nin n'otru tema", señaló la nota.