Avérase la Nueche d’Ánimes

El llunes ye la Nueche d’Ánimes, una xornada mui presente na nuesa tradición anque anguaño contaminada pola so versión estauxunidense: Halloween. Pa esta fecha, y esta fin de selmana, hai previstes delles actividaes en tol país alredor d’esta folixa de raigón celta.

El Samhain o Nueche d’Ánimes, como se conoz n’Asturies, ye l’añu nuevu celta; el pasu del branu al iviernu, cuando la escuridá gana a la lluz. Poro trátase d’una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos.

Son munchos los rituales que se fain esta nueche y ente les tradiciones qu’entovía lleguen a la nuesa fecha ta l’afuracamientu de nabos, anque tamién de calabaces, más populares anguaño pola televisión y el cine, que se solíen colocar nos cruces de camín nel pasáu. ¿Cómo lo celebres tu? Nesti reportaxe de ‘A la Gueta los Suaños’ pues garrar delles idees.

Otra manera, n’Asturies.com proponémoste delles actividaes pa estos díes:

• Dende’l sábadu pasáu, el xixonés Xardín Botánicu Atlánticu vien entamando delles actividaes baxo’l nome de ‘Calabaces y Calaveres’, con un ésitu grande de públicu, que van aumentar mientres los díes previos a la Nueche d’Ánimes, destacando sobre manera l’amagüestu y el conciertu de Petit Pop del sábadu y del llunes, que yá nun tien places llibres. Sí que ye posible disfrutar de la esposición de calabaces o de ‘La casona del miedu’, con entrada a 1 euru y sesiones cada 30 minutos, qu’inclúi la respresentación de la obra de teatru de solombres ‘El cementerio’, a cargu d’El Turnebís del Tribilín. El so horariu ye de 16.30 a 18 hores, el sábadu; y de 12 a 14 hores y de 16.30 a 18 hores, el domingu.
• Tamién en Xixón, onde Les Escuelones (Parque de La Serena), l’Asociación Sociocultural La Serena celebra’l llunes Samhain y un amagüestu’l martes. La folixa va principiar a les 16 hores con un pintacares y una taller d’ellaboración de bolses pa recoyer dulces, pa siguir con delles actividaes pa neños y mayores que va finar a medianueche con una ‘queimada terrorífica’. L’amagüestu, mentes, va celebrase a les 18 hores, anque yá pela mañana va haber xuegos de mesa y, de magar les 17 hores, una charra sobre instrumentos tradicional y un taller de ‘jumping clay’.
• El Muséu del Pueblu d'Asturies acueye dende mañana hasta'l 20 de payares la esposición 'Memento mori', esto ye, 'Recuerda que puedes morir', con delles pieces y documentos de la so coleición venceyada col cultu a los muertos, al so recuerdu y a la so memoria, entes les que'l visitante va atopar delles esqueles y recordatorios de finales del sieglu XIX y primera metá del sieglu XX, y cinco corones funeraries, un material mui difícil de ver en museos.
• En Mieres, el Conceyu y l'Asociación Hosteleros de Requejo entamen actividaes na plaza Requexu dende'l vienres y hasta'l martes baxo'l lema 'Nun ye Halloween, ye Samaín'. Na imaxe axunta asitiada baxo esta noticia vas poder atopar el programa completu, qu'inclúi xuegos con música, cuentacuentos, teatru de solombres, concursu de disfraces y una gimkana, ente otres munches. El llunes, Nueches de les Ánimes, va haber una discoteca móvil p'adultos ente les 23 y les 3 hores.
• Pela so parte, Somos Llanera celebra Samhain con una fiesta nel Llar de la Xente de Posada a partir de les 20 hores.